Koordenador Subsidiu Fim do Ano Munisipiu Dili, Luis da Costa hatete, iha dekretui lei uma-kain ne'ebé ho rendimentu $500 ba leten la simu subsidiu $200, tanba subsidiu $200 ne'e aplika ba uma-kain ne'ebé vulneravel.

Maibé, nia dehan, iha terenu, iha uma-kain balun ne’ebé sira-nia membru ho kargu Diretór Nasionál iha ministériu balun ho salariu $700 mós simu subsidiu.

"Ha'u hetan duni no akompaña iha terrenu Diretór Nasionál no polisia balun simu hotu subsidiu ne'e. Purezemplu, iha polisia eskuarda iha munisipiu Dili nian konsege simu duni $200, to'o ikus koordena mai ha'u hodi fó orientasaun ba Xefe Suku sira fó presaun maka’as konsege fó fali. Maibe Diretór Nasional lina ministerial balun ho salariu $700 mós simu $200, to'o agora seidauk fó fali,” dehan nia iha salaun MSSI, Kaikoli, Kinta (15/12).

Luis informa tan, iha mós Diretór Nasional balun ne'ebé iha prosesu pagamentu haruka sira-nia feen ka oan mak ba simu subsidiu.

"Ami haree direita, Diretór Nasional balun simu hotu, dala-ruma sira haruka feen ba, la'e oan mak ba, maibé sira-nia osan la deklara sai katak, ho rendiementu liu $500 maibé sira nonook de’it. Iha mós Diretór Nasional balun ba simu, la deklara sai rendiementu, maibé ikus mai ami buka hatene tuir sira-nia salariu, balun $700, balun $600," nia dehan.

Bainhira pagamentu remata, nia dehan, ekipa sei hato'o ba superior sira hodi bele prosesa.

“Atu prosesu halo oinsa ne'e kompetensia nasionál, ekipa ezekuta de'it programa no mós fahe informasaun ba sira. Ministeriu relevante sira ne'ebé toma atensaun ba subsidiu ne'e, parte Komisaun Anti Korupsaun no Provedoria Direitos Humanos no Justica no Tribunal mak iha kompetensia atu buka tuir, halo prosesu tuir lei,” dehan nia.

Enkuantu, nia hatutan, iha prosesu pagamentu ne’e, uma-kain vulneravel balun naran la sai iha lista.

"Ha'u mós hakfodak, tuir loloos uma-kain vulneravel sira naran mak sai, maibé membru governu balun, deputadu balun, polisia, diretór nasional kuaze naran ne'e sai hotu, maibé ema ne'ebé merese atu hetan naran la sai fali."

Maibé, nia hatete, iha tinan ne'e laiha lista reklamasaun no laiha benefisiariu atu halo justifikasaun hodi hetan fali direitu, tanba la hatete iha dekretu lei.

"Entaun ami servisu la'o tuir dekretu lei no simu orientasaun husi superior sira katak ‘imi selu de’it mak benefisiariu ne'ebé naran iha lista, laiha reklamasaun ida mak ita-boot sira simu hodi hadia fali halo pagamentu, ne'e laiha’," dehan nia ba jornalista jornal INDEPENDENTE, iha edifisiu, MSSI, Kaikoli, Kinta (15/12).

Maske iha dekretu lei ne’e la hatete, maibé, nia hatutan, depende ba desizaun governu nian atu halo fali pagamentu ka lae.

"Sira ne'ebé naran laiha depende ba desizaun governu nian, bele ka lae haree sira ne'ebé naran laiha bele hetan fali direitu, maibé buat hotu-hotu la'o tuir dekretu lei," dehan nia.