PR Horta informa, nia promulga ona Dekretu Lei kona-ba pagamentu estra-ordinariu ba salariu adisional fulan ida nian ka gaji 13.
"Gaji 13 mós ha'u promulga tiha ona, primeiru ba funsionáriu sira ne'ebé iha direitu hanesan uluk. Asesór sira simu, maibé só másimu vensimentu Diretór Jerál nian, se asesór manán $500, no asesór sira ne'ebé ho saláriu $1000 la simu," dehan PR Horta ba jornalista sira hafoin abertura ba programa nutrisaun iha Palásiu Prezidensiál Bairu-Pite, Kinta (15/12).
Molok ne’e, Ministru Prezidensial Konsellu Ministru (MPKM) Fidelis Manuel Leite Magahaes informa, hafoin governu haruk dekretu lei ba prezidesia repúblika, ikus mai PR haree no komunika fali ba governu atu halo alterasaun.
“Proposta ne'e governu haruka ona ba Prezidente Republika depois haree no komunika fali mai iha governu dehan katak, tanba iha prinsipiu igualdade mak atu labele halo diskriminasaun ba funsionariu kontratadu sira hotu, liu-liu hirak ne'ebe hanesan funsionariu kontratadu international, tenke tau hotu funsionariu Nasional no internasional iha kategoria ida de’it.”
"Tanba ne'e ohin iha reuniaun KM par halo alterasaun, ho alterasaun ne'e ita mantein nafatin diploma fulan Novembru nian katak, aumenta tan ho funsionariu kontradu sira hotu, la hare ba nasional ka Internasional, entaun hirak ne'ebe servisu hanesan kontratadu iha montante sei fiksa, purezemplu ninia montante iha gabinete Diretór Jeral, nia labele aas liu," dehan Fidelis ba jornalista sira iha Palasiu Governu, Segunda (12/12).
Iha alterasaun ne’e, Fidelis hatete, Primeiru Ministru Taur Matan Ruak fó hanoin katak tenke garante ba funsionariu hotu-hotu, labele halo diskriminasaun ba iha sira-nia direitu.
"Agora diferensa mak iha funsionariu ninia nivel salariu nian no kargu, maibé hotu-hotu direitu iha hotu," katak nia.
Nia esplika liu tan, ho alterasaun ne'ebé aprova pretende universalidade ba pagamentu estraordináriu, inklui hotu titulár sira ho kargu polítiku no traballadór sira hotu iha Administrasaun Públika, funsionáriu, ajente ka kontratadu sira no mós eis-titulár sira no eis-membru órgaun soberania nian.
Valor pagamentu estra-ordináriu ne’e, nia hatutan, ekivale ba valór saláriu mesál benefisiáriu nian ba fulan Dezembru tinan 2022.
Maibé, Fidelis dehan, atu uniformiza valór pagamentu estra-ordinariu entre traballadór sira iha Administrasaun Públika, sei estabelese limite tuir ekiparasaun ba rejime jerál.
"Ho nune'e, pagamentu ba traballadór sira Administrasaun Públika nian, nasionál ka estranjeiru, ne'e limitadu ba valór grau no eskalaun másimu tabela salariál kareira rejime jerál nian ka ba valor vensimentu ba ajente administrasaun publika ne'ebe kontrata ba ezersisiu kargu Diretor Jeral nian”, dehan Ministru Fidelis.
