Xefe Estadu Maior F-FDTL, Maijor Jeneral Lere Anan Timur hatete, aniversariu F-FDTL ba dala 16 ne’e marka istoria foun no signifikativu ba dezenvolvimentu F-FDTL.

“Ohin, instrumentu ida prinsipal iha espasu soberania ida ne’ebé ita define hanesan nasaun. Hanesan indikadór ida ba dezenvolvimento Timor-Leste,” deklara Maijor Jeneral Lere liu husi ninia diskursu iha sermonia aniversariu iha Kuartel Jeral F-FDTL, Fatuhada-Dili, Kinta (2/2).

Nia dehan, F-FDTL nia misaun mak atu kumpri misaun ida ne’ebé konstitusional haruka no ezerse hanesan forsa militar ne’ebé hetan apoiu masimu husi  governu Timor-Leste.

Tanba ne’e, Lere dehan, F-FDTL kumpri nia misaun tuir nesesidade nasaun nian hodi halo defeza no vizilansia atu kontrollu teritoriu nasionál no espasu ba maritimu.

Dezde tinan 2001, Lere dehan, F-FDTL nia ezistesia atu kumpri misaun tuir dalan konstitusional ne’ebé iha.

Kondekorasaun ba Lere

Entretantu, Komandante Supremu Forsa Armada no atual Prezidente Republika Taur Matan Ruak entrega medalla kondekoral ba Maijór Jeneral Lere nudar prestasaun servisu di’ak iha Forsa Armada.

Ba kondekorasaun ne’e, Maijor Jeneral Lere hato’o ninia agradesimentu ba Komandante Supremu ne’ebé rekoñese ninia prestasaun serbisu.

“Ha’u agradese ba Prezidete Republika ne’ebé fó medalla kondekora meritu mai ha’u,”  dehan Lere.

Nia dehan, medalla kondekoral meritu ne’ebé oferese husi Komandate Supremio nian haree ba prestasaun servisu hodi lidera institituisaun F-FDTL ho susesu.

“Hodi imi-nia disiplina, imi-nia respeitu susesu to’o ohin loron Prezidente Repúblika kondekora medalla ida ne’e ba ha’u nudar imi-nia komandate,” katak Lere.