Tuir Prezidente Tribunál Rekursu (TR), Guilhermino da Silva hatete, Tribunál Rekursu (TR) simu ona keixa kona-ba membru F-FDTL buti juis iha Munisípiu Ainaru.
“Sei lori ba konsellu atu haree tanba ha'u labele deside mesak,” dehan nia, iha ninia servisu Fatin Kaikoli-Dili, Sesta (3/2).
Alende ne’e mós Prezidente Asosiasaun Majistratura Judisiál Timor-Leste (AMJTL) António Gonçalves hatete, lamenta ho membru F-FDTL ho brutalidade buti juis Benjamín Barros, iha Munisípiu Ainaru la ho razaun.
Akontesimentu ne’e, iha loron 27 Janeiru 2017. Iha altura ne’e, Juis Benjamín Barros husi Suai ho motorizada atu mai Dili, to’o iha Kampaun Administrasaun Ainaru Vila nia haree ema barak hamriik hela iha Estrada nia mós para nia motór tanba momentu ne’e hatún hela Bandeira iha Kampu Ainaru Vila, maizumenus tuku 06:00 lokraik.
Bainhira nia mai besik iha fatin ne’e nia haree ema barak hamriik hela iha estrada nia mós para nia motór hodi hato’o sinál respeitu ba Bandeira Nasionál ne'ebé iha momentu loraik ne’e hatún.
Depois hatún tiha bandeira mak membru F-FDTL na’in tolu ba buti juis nia kakorok, maibé nia la hatene ho razaun saida mak membru nain tolu ne’e buti nia kakorok.
“Entre membru na'in tolu ne’e ida tau farda F-FDTL nian no na’in rua seluk uza sivíl, membru hirak ne’e iha postu F-FDTL Ainaru vila,” tenik Antonino.
Nia esplika, kazu ne’e agora daudaun informa ona ba Tribunál Rekursu atu bele toma medida ba aktu sira ne’e no asosiasaun mós simu ona karta husi juis ne’e, kolia ho Tribunál Rekursu atu hola desizaun, tanba la’ós foin primeira-vés tanba kazu baku juis dala tolu ona, bainhira juis ida ba enxe mina iha sentru kombustivel Tiger Fuel mós sira baku tanba hahalok sira ne’e atu sai kostume ema baku juis.
Husi asosiasaun nia haree, la’ós juis de'it kualkér ema ida tenke halo tratamentu ho étika uitoan labele ho forsa atu hasoru ema seluk.
“Juis hanesan órgaun soberania ida ita tenke respeitu se nia halo sala halo keixa ba iha konsellu superiór katak juis ida ne’e sala, labele halo justisa ho liman rasik,” tenik Antonino.
Tanba ne’e, nia dehan, ba oin asosiasaun hamutuk ho vítima tenke halo keixa ba Ministériu Públiku tanba husi tribunál hatene ninia keixa. Tanba ne’e, kanaliza kedas ba iha Ministériu Públiku hodi informa ba Konsellu Superiór no Prezidente Tribunál Rekursu hodi toma medida husi instituisaun ba instituisaun.
Husu ba kualkér se de'it labele toman baku juis, tanba lia hotu mai kotu-kotu iha tribunál se la respeita, ikus liu desizaun hotu-hotu hakotu iha tribunál tantu husi prezidente to’o populasaun ki’ik. Tanba ne’e, mak tenke tau neon no fó konfiansa, labele lori liman mak baku, satan membru F-FDTL.
