Tuir Xefe Departamentu Re-integrasaun Alarico Fernandes, ne’ebé reprezenta Diretór Diresaun Nasionál Empregu Estranjeiru enkoraza foinsa’e Timor-oan na’in 47 ne’ebé ba servisu iha Australia atu hatudu komportamentu servisu di’ak, hodi kumpri promesa ne’ebé halo ona ho governu katak labele halai ses husi sistema.

“Ba servisu iha Australia halai ses husi sistema, ita sei tau ita nia aan ba iha risku, tanbá halai sai husi sistema, hetán problema ruma hó empregadór ita na’in maka rezolve, nune’e mós karik fila mai Timor-Leste sei labele hetan tan oportunidade atu ba servisu iha Australia,”dehan nia iha edifisiu DNEE, Bekora,(23/11).

Xefe Departamentu mós apela ba joven Timor-oan na’in 47 ne’e ba servisu iha Australia reprezenta nasaun Repúblika Demokratika Timor-Leste, nune’e labele pratíka fila-fali arte-marsiais no arte-rituais iha ema nia rain.

“Polítika governu haruka traballadór Timor-oan ba servisu iha rai-liur, primeru atu redus númeru dezempregu iha ita nia rain, segundu ba servisu hetán esperensia foun husi ema nia rain, manan osan, hodi nune’e fila mai dezenvolve ita nia nasaun sai hanesan pais sira seluk ne’ebé dezenvolvidu iha mundu,”tenik nia.

Entretantu, traballadór Timor-oan na’in 47 ne’ebé ba servisu iha Australia kompostu husi mane na’in 26 no feto 2, ne’ebé sei ba servisu iha kompañia tolu maka hanesan, Hillwood Berries, Tasmania Berries no kompañia Eastern Colour.