Proposta OJE 2024 to'o ona PN, Deputadu 65 mak sei Hili Karakter Debate Featured

By Julião da Silva Novembru 24, 2023 1379
Proposta OJE 2024 ne’e entrega diretamente husi Ministra Finansas, Santina José Rodrigues F. Viegas Cardoso ba Prezidente Parlamentu Nasinal, Maria Fernanda Lay, iha Knar fatin, PN, Kinta (23/11). FOTO: Media PN. Proposta OJE 2024 ne’e entrega diretamente husi Ministra Finansas, Santina José Rodrigues F. Viegas Cardoso ba Prezidente Parlamentu Nasinal, Maria Fernanda Lay, iha Knar fatin, PN, Kinta (23/11). FOTO: Media PN.

DILI: Submisaun kona-ba Proposta lei Orsamentu Jeral Estadu (OJE) 2024 hamutuk billaun US$1.95 husi governu dasia, to'o ona iha Parlamentu Nasional (PN).

Iha submisaun proposta ne'e, governu sei husik ba deputadu na'in 65 iha Parlamentu Nasional mak sei hili debate ho karakter urjensia ka debate ho karakter normal.

Proposta OJE 2024 ne’e entrega diretamente husi Ministra Finansas, Santina José Rodrigues F. Viegas Cardoso, akompaña husi Vise-Ministra Finansas, Felicia Claudinanda da Cruz Carvalho no Vise-Ministru Asuntu Parlamentar, Aderito Hugo da Costa.

Husi valór totál konsolidadu billaun US$ 1,95 ne'e aloka ba Administrasaun Sentrál, billaun $1,83 no ba Rejiaun Administrativa Espesial Oekusi Ambeno (RAEOA) tokon 60 enkuantu iha mos alokasaun ba Orsamentu Seguransa Sosiál, inklui Fundu Rezerva Seguransa Sosiál, iha montante millaun US$ 347,6.

Nune'e, totál despeza ne’ebé prevee ba Administrasaun Sentrál no RAEOA, tokon US$ 468,8 uza ba saláriu no vensimentu, tokon US$ 386,3 ba bens no servisu, tokon US$ 589,7 ba transferénsias públikas, tokon US$ 34,2 ba kapitál menór no tokon US$ 411 ba kapitál dezenvolvimentu.

Iha proposta OJE ne'e prevee mos valór tokon US$ 788,2 ba asuntu ekonómiku, tokon US$ 467,1 ba protesaun sosiál, tokon US$ 140,9 ba edukasaun, no tokon US$ 66,2 ba saúde inklui tokon US$ 45,2 ba abitasaun no infraestruturas koletivas.

Hafoin aprezentasaun OJE, Ministra Finansa, Santina Cardoso, hatete governu kumpre nia dever hodi aprezenta sedu OJE 2024 ba PN atu bele debate.

"Ha'u hanoin governu hatama mai sei husik ba PN par atubele deside nia karakter urjensia ka lae mais governu tenta kumpre tuir lei fulan lima depois toma mandatu, ohin ami hatama sedu liu iha dia 23 Novembru 2023,"dehan nia iha PN, kinta (23/11).

Fatin hanesan Vise, Ministru Asuntu Parlamentar Aderito Hugo da Costa hateten, iha prinsipiu governu dasia liuhusi Primeiru Ministru Kay Rala Xanana Gusmão justifika komprimentu lei sira halo submisaun proposta Orsamentu ne'e tanba ne'e governu foun, tuir lei iha fulan lima atubele aprezenta OJE.

"Konta husi 1 jullu, ami tuir loloos hatama iha dia 1 Dezembru, mais hanesan ohin Ministra dehan ona ami hatama sedu tiha iha dia 23 Novembru, entaun ne'e kumpre sedu liu tiha akordu ho lei nian,"katak nia.

Aderito relata, nota esplikasaun Primeiru Ministru nian ne'ebe submete hamutuk ho proposta OJE 2024, ne'e atu fo konsiderasaun ba sirkustansia tempu tanba governu presiza orsamentu ne'e antes tinan foun siknifika bainhira tama tinan foun ne'e orsamentu 2024 ne'e tenke aprova ona.

"Tanba labele iha fali tempu ida purzemplu ita tenke tama fali rejime duo desimu iha janeiru ho fevereiru entaun ida ne'e mak governu justifika i agora espera katak PN halo leitura ba nota justifikativu ne'ebe Primeiru Ministru aprezenta halo karta akompanamentu ba submisaun orsamentu ohin nian,"katak nia.

Nia haktuir, konteudu husi karta PM nian ne'e temi katak, see bele adianta lais liu, ne'e di'ak liu, nune'e governu labele tama ba rejime duo desimu iha tinan oin.

Purtantu, Prezidente Parlamentu Nasionál Maria Fernanda Lai, promete iha tempu badak sei konvoka reuniaun ho Prezidente Komisaun Espesializada Permanente sira hodi diskute ajendamentu ba diskusaun OJE 2024.

Rate this item
(0 votes)

Independente Digital TV

Tuir ami iha Twitter

Kalendariu Notisia

« April 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30