Diretór Nasionál Seguransa Alimentár, Justino dos Santos Silva hatete, Timor-Leste sei enfrenta mudansa klimátika El Niño iha tempu badak nia laran.

“Tuir dadus ne'ebé ami iha daudaun ne’e, El Niño ninia predisaun iha fulan-Jullu 2017 sei akontese”, dehan nia, iha ninia servisu fatin, horisehik.

Ne’e duni, atu antesipa situasaun ne’e ministériu agrikultura servisu hamutuk ho parseiru sira prepara-aan hodi hasoru mudansa ne’e.

Nia esplika, ajénsia nasionál no internasionál sira fó ona apoiu ba governu hodi distribui ba komunidade agrikultór sira bainhira dezastre ne’e mosu mai.

Entretantu, preparasaun MAP nian, estensionista sira iha Munisípiu husi área oioin hanesan pekuária, peska, produsaun alimentár no floresta nian preparadu atu fó atendimentu.

Ministériu Agrikultura mós identifika ona munisípiu neen (6) mak sei hetan impaktu boot liu husi dezastre, ne’ebé ninia dadus aprezenta ona Konsellu Ministru.