Nia dehan, embaixadór sira bainhira foun lori sira nia kredensiál mai atu hatudu hahú servisu ona iha Timor Leste, tanba ne’e sira sei foka iha área barabarak hanesan edukasaun, agrikultura no mós meiu ambiente.
“Embaixadór mós iha ideia sira no planu atu halo no kumpre dezenvolvimentu Timor-Leste nian ho kooperasaun husi Tailandia foka iha área barabarak hanesan edukasaun, agrikultura, no meiu ambiente ne’ebé ohin loron modernu,” dehan Agio, iha Palasiu Prezidensiál, Bairru-Pité, horisehik.
Nia hatete, Embaixadór Tailandia nia mandatu ne’e sei koopera ho governu no Prezidensia Repúblika atu reforsa relasaun entre estadu rua ne’e.
Antes aprezenta karta kredensiál ba Prezidente Repúblika, Embaixadór-Dezignadu Tailandia ba Timor Leste, hala’o ona sorumutu kortejia ho embaixadór sira nasaun Sudeste Aziátiku iha Timor Leste hodi troka hanoin kona-ba situasaun polítika TimorLeste nian, dezenvolvimentu ekonómiku no dezafiu sosiál sira agora no iha futuru. Alende sira mós atualiza ba malu iha sira nia ajenda prinsipál sira embaixada nian atu la’o ba oin iha tinan 2024.
Entretantu, Prezidente Repúblika José Ramos Horta hato’o nia konfiansa katak Embaixadór Atipat Rojanapaibulya nia nomeiasaun sei hasa’e no hametin ligasaun amizade no kooperasaun entre Timor Leste no Tailandia.
