Tuir Sekretária Estadu Igualdade, Elvina de Sousa Carvalho hatete, komemorasaun loron internasionál ida ne’e ho tema prinsipál maka investe ba feto rurál hodi avansa ba oin susesu husi feto maluk sira hodi ultrapasa dezafiu no bareira iha futuru oin mai.
“Iha loron 08 fulan-Marsu tinan ne’e SEI sei komemora loron internasionál feto iha Timor-Leste ba dala-48, husi komemorasaun ne’e sei prienxe ho atividade lubuk ida maibé, servisu hamutuk ho Prezidente Repúblika (PR) liu husi programa Horta Show, atividade produtiva, providénsia asesu ba saúde, estrada, edukasaun,” dehan nia iha Timor Plaza, Kuarta (06/03).
Tanba ne’e, komemora loron internasionál ne’e halo reflesaun no sai hanesan referénsia ida hodi motiva no enkoraza feto maluk sira iha vontade hodi hakat ba oin ho di’ak.
Nia informa, iha plataforma ida mak deklarasaun ne’ebé tau hamutuk kompromisu liu husi liña ministeriais sira servisu ligadu ba promosaun atividade produtiva no ba providénsia hodi asesu ba estrada.
Aleinde ne’e mós, estrada rurál no asesu ba iha edukasaun hodi asegura maluk feto rurál sira hodi asesu ba dezenvolvimentu liga ba plataforma polítika deklarasaun ne’ebé lansa iha fulan kotuk maibé, esforsu hodi avansa ba oin.
Atu nune’e maluk feto rurál sira nafatin hetan oportunidade hodi bele asesu ba buat hotu maibé, iha feto maluk balun seidauk iha konsiénsia no oinsá atu bele kuidadu nia an rasik no kuidadu nia raan rasik.
Tanbá realidade hatudu iha maluk feto balun kontinua soe bebé iha dalan públiku hahalok hanesan ne’e la tolera tanba krime tenke iha responsabilidade rasik ba nia aktu ne’e hodi prosesa tuir lei haruka.
