Diretór Servisu Saúde Munisipál Ermera, António de Deus Fátima hatete, saúde munisípiu Ermera preokupa tambá tama ona ba tempu udan moras chikungunya no Dengue kontinua rejista ho númeru neebé maka aas tebes.
“Agora dadaun iha munisípiu ita hasoru hela problema boot ida, tanba iha fulan rua de’it ita rejista ona moras dengue ho chikungunya as liu munisipiu Ermera, li-liu iha tempu udan, ita rejista hela moras dengue. Depois ita rejista chikungunya 149, husi númeru ne’e, wainhira ita lori sampel ba halo teste iha laboratórium nasional 79 maka positivu, no ita hela 60 sample nee, seidauk halo teste tanba reajente laiha,” Dehan Diretór Servisu Saúde Munisipál Ermera António, iha Timor Plaza, Kuarta (06/03).
Nia dehan, pasiénte sira-mai ho chikungunya nia sintomas hanesan ho dengue, entaun sira halo hotu tratamentu iha sentru refere no la transfere mai iha Ospitál Nasional Guido Valadares (HNGV).
“Ita haree ba sintomas hanesan ho dengue ita mos trata tuir sintomas de’it, ne’ebé ezemplu durante ne’e ita laiha ai-moruk seluk, ita fó de’it maka parasetamol, ita haruka nia hemu bee barak, hemu jus, karik sira-ne’ebé maka ita haree grave, ita koko ho ai-moruk diclofenac,” Nia hatete.
Nia haktuir, saúde munisipiu Ermera mos rejista virus foun ZIKA na’in ida, maibé agora hot-hotu ho rekoperadu di’ak, tanba husi moras tolu ne’e laiha ema ida maka lakon vida.
Ho ida ne’e, Servisu saude munisipiu Ermera kopera ho Prezidente Autoridade Munisípiu, administrador Postu ho liña ministeriais hot-hotu servisu hamutuk hodi kombate moras tolu ne’ebé rejista ona.
“Agora dadaun ne’e ita halo hela fomigasaun masal bazeia ba orientasaun husi Ministra Saúde Élia dos Reis Amaral, ami halo fomigasaun ne’e loron ida dala-rua, nune’e mos ami halo abatesasi, ami mos halo promosaun saúde rutina ba iha ita nia komunidade sira,” Nia relata.
Molok ne’e, Ministériu Saúde (MS) liu husi Diresaun Geral Kuidadu Saúde Primaria rejista ona ema ne’ebé afeita ba moras chikungunya hamutuk 183, husi númeru ne’e, maioria Munisípiu Ermera no Munisípiu Díli.
“Iha tinan ida-ne’e Ministériu saúde rejista kazu chikungunya hamutuk 183, husi númeru nee ita rejista as liu iha munisipiu ermera no munisipiu Dili rasik,” Dehan nia.
