Diretór Servisu Saúde Munisípiu Ermera, António de Deus Fátima hatete, rekrutamentu ne’ebé iha, bele ona responde ba fasilidade saúde sira-ne’ebé agora dadaun menus hela rekursu umanu.
Nia dehan, tanba iha rekrutamentu ne’ebé Ministériu Saúde halo ne’e SSM Ermera presiza profesional saúde hamutuk 67.
“Provizoriamente ne’e rekursu umanu ne’ebé menus liu ne’e mak iha sentru saúde Atsabe, ho sentru saúde Letefoho, ba postu saúde provizoriamente ema laiha, tanba professionál saúde internatu sira, para ona kontratu, iha 31 fulan dezembru 2023, maibé ita nafatin halo jestaun hodi kontinua halo tratamentu,” Dehan Diretór Servisu Saúde Munisipál Ermera, António, iha Timor Plaza, Kuarta (06/03).
Nia haktuir, relasiona ho ida ne’e, Agora dadaun Ministériu Saúde halo hela rekrutamentu ba Enfermeiru, Parteira no Médiku sira ba iha etapa premeiru, saúde munisípiu Ermera sei hetan pesoál saúde 67, atu bele koresponde nafatin ba fasilidade sira-ne’ebé maka mamuk.
Maske nune’e, nia afirma, seidauk sufisiente, maibe Ministériu Saúde sei nafatin iha rekrutamentu ba iha faze segundu no terseiru, ne’ebé hanoin termina faze tolu ne’e, bele iha ona pesoál saúde ne’ebé maka sufisiente ona, atu bele halo atendimentu ba iha komunidade sira.
Nia subliña, professionál saúde sira-ne’ebe remata sira-nia kontratu iha 31 fulan dezembru tinan 2023 hamutuk 80 resin no agora dadaun rekrutamentu ba pesoál saúde sira hodi koloka ba munisipiu ermera hamutuk 67.
Entretantu, Portavos Komisaun Ekipa Integradu Saúde iha Ministériu Saúde, Vidal de Jesus Lope, rekoñese katak postu saúde iha Munisípiu sira balun provizoriamente taka, tanba kestaun rekursu umanus.
“Mais solusaun ba ida-ne’e, intermus de Rekursu umanu, agora dadaun la’o hela, inisiu (fulan) marsu bele iha ona solusaun, hodi koloka ita-nia rekursu sira-ne’e, ba fatin sira-ne’ebé presiza duni,” Nia relata.
