Diretór Jerál STAE, Acilino Manuel Branco hateten, depois Tribunál Rekursu haruka mai iha STAE verifika kedas ona, maibé sei disponivel nafatin bainhira husu atu kompletu prosesu balun.
“Prosesu verifikasaun remata iha Kuarta (8/2), ami haruka hotu ona rezultadu verifikasaun ba fali Tribunál Rekursu,” dehan nia, edifísiu STAE, Kaikoli-Dili, Sesta (10/2).
Tuir nia, TR tenke haree ninia rezultadu ne'ebé iha no bele halo konkluzaun para informa fila-fali ba kandidatu ida-idak liu husi ninia reprezentante. Rezultadu ne'ebé iha ne’e kandidatu sira kumpre ona rekizitu ka iha buat balun presiza sei hadi’a no kompleta.
Entretantu tuir nia, bainhira Tribunál Rekursu haree buat balun husi kandidatura presiza halo kompleta tenke notifika imediata kedas ba reprezentante kandidatu ne’e atu bele kompleta lalais iha Tribunál durante oras 48.
Nia dehan, husi TR sei haruka fila fali ba STAE halo fila-fali verifikasaun, depois mak haruka fila fali ba iha TR. Depois TR tenke haree fila-fali. Kuandu loos ona entaun remata ona, maibé bainhira seidauk kompleta fó nafatin tempu mak kuandu la biban ona desizaun ikus liu sei bele anula.
“To’o agora ami seidauk simu fila-fali pedidu ruma husi Tribunál. Maibé tuir kalendáriu katak hakarak ka lakohi TR tenke hasai ona desizaun finál kona-ba kandidatu ne'ebé admitiva atu kompete iha eleisaun,” dehan Acilino.
Nia hatutan, iha loron 15 Fevereiru Tribunál hasai desizaun mak iha rekursu ruma ka kandidatu sira balun la satisfás ho demisaun ne'ebé iha, entaun sira bele hatama rekursu iha loron 16, maibé kuandu laiha iha loron 16 Fevereiru bele ona halo sorteiu.
