Ne’e duni, STAE halo soru-mutu ho pontu vokal partidu polítiku sira hodi atualiza preparativu hotu kona-ba eleisaun ninia, liu-liu kona-ba planu distribuisaun material no mós ekipamentu sira.

Diretór Jerál STAE, Acilino Manuel Branco hateten, material ne’e kategoria sensitivu, tanba ne’e sei utiliza ba iha loron eleisaun ninia.

Kona-ba prosesu preparasaun ba iha sistema tabulasaun ninia importante halo prosesu apuramentu iha munisipiu ne’ebé oras ne’e daudauk tékniku sira halo hela prosesu preparasaun no ikus mai sei aprezenta ba sira iha loron 9 Maiu ne’e.

Diretor ne’e dehan, STAE husu mós ba partidu politiku sira atu bele partisipa no akompaña espesialista tekniku informasaun sira atu bele intede didi’ak kona-ba funsionamentu sistema tabulasaun.

“Husu ba (parpo) sira atu bele kompleta prosesu akreditasaun ba fiskais ninia iha tempu badak ne’e nia laran”, dehan Acilino, iha servisu fatin, Kaikoli, Segunda (30/4).

Nia hatutan, STAE informa ba sira prosesu imprimisaun buletin votu hotu ona, tuir planu loron 4 Maiu dadeer grafika nasionál sei entrega ba iha STAE no sei halo transportasaun ba munisipiu 12 no RAEOA, inlkui ba Portugal, Inglatera, Australia no Koreia.

Iha prosesu transportasaun sira ne’e STAE mós husu ba partidu polítiku sira ninia reprezentante atu halo akompañamentu másimu ba iha prosesu sira ne’e desde transportasaun husi Dili ba munisipiu.

“Sei utiliza cheek list ne’ebé ita sei halo lori verifika material sira ne’ebé tama ba iha urna laran, depois sira tenke asiste mós antes urnas ne’e atu segel depois ita mós husu ba sira atu prepara kondisaun atu lori halo akompañamentu material sira ne’e ba to’o iha sentru votasaun”, dehan nia.

STAE mós husu ba sira atu hela hamutuk ho pessoal STAE ninia hanesan brigada hamutuk ho polísia administradór sira delegadu CNE ninia atu toba iha sentru votasaun sira to’o dader, nune’e loke fila-fali urna ne’ebé sira halo akompañamentu husi munisipiu ba sentru sira depois verifika dala ida tan material sira ne’e lori entrega ba iha sekretáriu estasaun ida-idak antes bele utiliza material sira ne’e ba iha eleisaun.

Aprezenta mós prosesu votasaun kontajen no mós apuramentu ba sira, nune’e sira bele mós trasa sira ninia planu hanoin atu koloka sira ninia pessoal sira atu bele halo akompañamentu prosesu tomaka to’o iha rohan ikus liu akompaña rezultadu apuramentu munisipiu ho dokumentu sira seluk lori mai iha CNE lori kontinua apuramentu ba nasionál ninia.

“Ha’u hanoin sira ne’e hotu makaa ita hato’o ba sira ikus liu ita vizita ba iha material sira seluk material hotu-hotu ne’ebé ita halo ona pakotementu iha ne’e halo mós vizita ba iha urnas ne’ebé ita simu husi governu Cina hatudu ba sira kualidade husi urnas ne’e rasik ho ninia kuantidade,” tenik nia.