Diretór Ezekutivu JSMP, Luis Oliveira Sampaio hatete, deputadu sira loloos tenke iha sensibilidade ba realidade povu nian atu bele uza karreta ne’ebé deputadu tuan sira husik hela to’o kondisaun la di’ak maka hafoin husik.

“Ita kontinua ezije ba sira nia kompromisu ne’ebé sira halo tiha ona, liu-liu ba deputadu sira partidu foun ne’ebé mai ho vizaun foun mai ho ambisaun foun, mai ho interese foun no mai ho sira ninia filozofia polítika foun”, dehan nia.

Nia fó ezemplu hanesan PLP ne’ebé hakarak fahe rekursu hanesan hodi halakon priviléjiu sira no diskriminasaun. Ne’e duni, ho sira nia prezensa bele halakon diskriminasaun entre órgaun soberania ho povu atu labele iha diferensa.

“Ami labele muda buat ruma, só ita ezije de’it konxiénsia polítiku sira ne’e atu haree ba situasaun reál povu ninia no halo polítika ne’ebé reflete ba povu ninia situasaun atuál”, informa nia.

Nia reforsa katak, ezijénsia ne’ebé hato’o dala barak reprezenta situasaun atuál povu nian ne’ebé halerik iha área rurál. Ne’e duni husu sensibilidade ba deputadu foun sira haree ba situasaun sira iha foho.