Deputadu David Dias Ximenes hatete, atu asume knaar hanesan Xefe Estadu Maiór Jenerál la'ós buat fasil, tanba ne’e atu asume kargu tenke iha autoridade esperiénsia, hatene situasaun seguransa no defeza iha futuru.

Nia hatutan, Jenerál Lere ohin loron nia idade tama ona ba reforma, maibé sei bele atu asume knaar ne’e, tanba durante iha nia mandatu laiha defisiénsia ruma. Ne’e duni, iha autoridade polítika atu bele kontinua haree ba situasaun dezenvolvimentu institusionál no ba situasaun jerál.

“Ha'u hanoin atu lidera instituisaun F-FDTL ne’e la'ós haree de'it ba nivel akademia, maibé tenke iha autoridade intermu lideransa no polítika”, dehan Mandati, Uma Fukun PN, horisehik.

Nia hatutan, kargu hanesan Xefe Estadu Maiór la'ós Lere mesak mak atu asume. Ohin loron nia mós katuas ona, loron ruma sei entrega ba jerasaun foun sira, maibé atu troka ne’e depende ba situasaun polítika nasaun ne’e nian.

“Ita mós hanesan nasaun pos konflitu husik nia asume knaar ne’e, kuandu situasaun polítika ne’e la’o di'ak hotu ha'u hanoin nia rasik sei entrega”, tenik nia.

Antes ne’e, jerasaun foun husi instituisaun F-FDTL prepara ona ema na'in tolu atu troka Lere mak hanesan Kapitaun de Fragata Higino das Neves, Koliati no Komandante Mar e Gerra, Donanciano Gomes ‘Pedro Klamar Fuik’.

Iha fatin hanesan, Deputadu Natalino da Costa hatete, atu estende ka nomeia Xefe Estadu Maiór Jenerál Forsa Armada ne’e kompeténsia husi lider ezekutivu sira, maibé hanesan deputadu no individu hakarak atu mantein nafatin Lere Anan Timur atu kontinua lidera instituisaun defeza.

“Ha'u hanoin fó tan mandatu dala ida tan ba Maiór Jenerál Lere atu bele kontinua lidera F-FDTL hodi kria kondisaun ba jerasaun foun”, dehan nia.

Nia hatutan, atu kaer instituisaun ne’e presiza ema ne'ebé bele duni. Tanba ne’e, atu haree fali ba lei atu fo ka lae ne’e depois mak haree fali.

Iha fatin hanesan, Prezidente Komisaun B PN, Fidelis Magalhães hatete, kona-ba mandatu Majór Jenerál Lere nian komisaun B sei haree husi lei. Presiza haree buat barak, maibé tau mós konsiderasaun ba ezekutivu sira atu ezerse sira nia funsaun.

“Ita labele komenta uluk lai, tanba buat ne’e sei komplikadu haree husi lei buat barak ita sei haree”, dehan nia.

Nia hatutan, Maiór Jenerál F-FDTL hetan nomeasaun polítika husi podér ezekutivu sira nian, maibé la'ós asume knaar hodi halo polítiku, tanba ne’e presiza tetu didi’ak hafoin komenta.