Oras ne’e iha ona prosesu diskusaun no votasaun ba pontu rua importante ba alienasaun prado antigu no sosa prado foun. Prosesu hirak ne’e iha tempu badak sei lori ba plenária atu halo diskusaun.

“Kona-ba prosesu alienasaun karreta ne’e agora daudaun iha prosesu laran, no diskusaun sei hato’o ba plenária tanba seidauk iha tempu no oportunidade atu diskute”, dehan nia, iha Uma Fukun PN, horisehik.

Nia dehan, kona-ba prosesu ne’e seidauk iha desizaun ikus atu deside tanba sei halo diskusaun kle'an.

Prosesu ne’e sei la’o hela maibé, Konsellu Administrativu Parlamentu Nasionál reprezenta husi bankada lima halo ona votasaun ho rezultadu sosa prado foun ba deputadu 65.

Ante ne’e, portavós MUTL, Miguel Arcanjo hatete, sira-nia pozisaun maka kontra ba leilaun karreta prado no kontra sosa karreta foun ho marka prado.

Desizaun foun ne’e bankada lima iha Parlamentu Nasionál halo sees malu ho saida mak deputadu anteriór sira halo hodi entrega hotu karreta sira ne'e ba deputadu foun sira hodi utiliza ezerse sira nia funsaun.

Ne’e duni, tuir Miguel, hatudu ba povu katak partidu polítiku sira ne’e hanesan lixu. Tinan lima mai tan di'ak liu lalika vota, tanba sira mesak grupu mafiozu no lohi-teen.