Sekretaria Meza Parlamentu Nasionál, Lídia Norberta hatete, meza Parlamentu Nasionál simu ona karta ofisial ida husi Prezidente Repúblika kona-ba lei rua ne'ebé hetan veta iha loron hira liubá.

Nia hatutan, lei rua ne’e hanesan Lei Podér Lokál no Lei Desentralizasaun Administrativa, agora daudaun ne’e Prezidente Parlamentu Nasionál despaxa ona ba Komisaun A PN asuntu lejizlasaun no justisa atu bele halo fali apresiasaun.

Deputadu Aarão Noe de Jesus hatete, mandatu ikus III Lejizlatura iha fulan Agostu liubá konsege lori lei tolu hanesan alterasaun ba Lei Renumeratoriu Órgaun Judisiáriu, Lei Podér Lokál no Lei Eleitorál Munisipál.

Lei tolu ne’e Prezidente Repúblika konsege aprova ona lei rua hanesan alterasaun ba Lei Renumeratoriu Órgaun Judisiáriu no Lei Eleitorál Munisipál, maibé Lei Podér Lokál veta tiha.

Aarão preokupa tanba Prezidente Repúblika veta lei ne’e liu tiha loron 30 nia laran, ne’ebé hatudu katak iha intensaun polítika ruma tanba la tuir koridor.

“Ha'u hanoin Lei Podér Lokál no Lei Administrasaun Lokál ne’e importante tebes atu lori administrasaun hakbesik ba povu no minimiza burokrasia”, dehan Aarão, iha Uma Fukun PN, horisehik.

Nia hatutan, lei rua ne’e hahú kedas iha primeiru governu mai to’o VI Governu halo ona peskiza naruk hafoin produs, atu bele trasa tuir Planu Estratéjiku Dezenvolvimentu Nasionál (PEDN). Tanba ne’e, kuandu Prezidente Repúblika veta sei prejudika ba programa ne’e.

Nia hatutan, kona-ba kestaun kontrolu atribuisaun podér husi sentrál ba lokál ne’e nia mekanizmu la hanesan, kuandu aloka osan ba governu lokál mak la di'ak, governu sentrál bele dada fila hodi halo fali jestaun.