Ministra Edukasaun (ME), Dulce de Jesus Soares hatete, Ministériu Edukasaun halao enkontru ho Vise Ministra asuntu ASEAN, Milena Rangel hodi ko’alia kona-ba preparasaun rekursu umanu nian ne'ebé tuir formasaun servisu aliñamentu ho nasaun sira iha ASEAN.
“Ami prepara rekursu iha tempu badak sei iha formasaun ida ba superiór sira iha ME, atu nune’e Ministeriu Edukasaun bele koñese oinsa mak atu halo servisu aliñamentu ho nasaun sira ne’ebé mak hola parte iha ASEAN,” dehan Ministra Dulce iha sala VIP-ME Vila-Verde, Tersa (09/01).
Ministra akresenta, dadaun nee komesa identifika rekursu sira iha ME hodi prepara ba servisu refere, enkuantu formasaun ne’e sei liga liu ba papél Ministériu Edukasaun nian atu envolvimentu iha ASEAN.
“Se iha Edukasaun ami nia papél importante mak atu garante katak kuríkulum iha ME iha ka lae nia aliñamentu ne’e hodi servisu hamutuk ho nasaun sira seluk hodi hasa’e kualidade edukasaun,” katak Ministra.
Iha fatin hanesan, Vise-Ministra Asuntu ASEAN Milena da Costa Rangel hatete, tempu badak Sekretariadu husi ASEAN sei vizita Timor-Leste tan nee sei fó treinamentu ofisial direjentes husi Ministeriu hanesan, Diretór Jeral, Diretór Nasionál no pontu vokál sira iha ME ne’ebé tama ona iha pilár sosio-kulturál.
“Ministériu Edukasaun iha papél importante tebes iha treinamentu refere liliu ba ofisiál dirijente sira tanba ne’e mai kordena hamutuk ho ME hodi haree partisipasaun hamutuk ho Ministeriu no ajénsia sira seluk ne’ebé hala’o servisu iha sosio-kulturál,” dehan Vise-Ministra.
Ho nunee, Vise-Ministra mós husu ba Ministra Edukasaun ho ekipa atu fó apoiu tomak atu nune’e formasaun ne’e bele la’o ho susesu hamutuk ho delegasaun sira husi ASEAN.
Enkuantu, formasaun ba dirijentes sira husi Ministeriu Edukasaun durante loron tolu hahú loron 6-8 fulan-Marsu 2024.