Diretór Nasionál Asistensia Sosial, Fernando dos Reis hatete, programa benifisiariu Bolsa da Mãe-Jerasaun Foun (BdM-JF) durante tinan rua nia ne’ebé hahú iha fulan Jullu 2022 too Dezembro 2023 MSSI selu ona 50.723.
Diretór mós afirma, Polítika IX Governu nia katak programa Bolsa da Mãe-Jerasaun Foun (BdM-JF) pagamentu remata ona iha 31 Dezembro 2023 no sei la kontinua.
“Atu akresenta katak polítika nee sei la kontinua iha 2024, tanba polítiku esklaresidu ona,” dehan Diretór Nasionál Asistensia no Sosial, Fernando dos Reis, ba Jornalista iha nia knaar fatin Kaikoli, Segunda (08/01).
Diretór esklarese, benifisiáriu ne’ebé MSSI rejistu iha sistema hamutuk 61,349 ne’ebé kompostu husi 11,434, labarik 49,244, no defisiénsia 221.
Diretór dehan, husi dadus ne’e benifisiáriu ne’ebé MSSI rejistu iha rihun sanolu (10 mil) mak la hetan pagamentu tanba sira-nia dokumentu la kompletu.
Enkuantu, dadus benifisiáriu ne’ebé MSSI rejistu hamutuk 61,349 ne’ebé kompostu husi munisípiu hitu (7) hanesan, munisípiu Ainaro, Bobonaro, Kovalima, Likisa, Vikeke, Manatuto no Rejiaun Administrativa Espesial Oekusi Ambeno (RAEOA).
Entertantu, orsamentu ne’ebé governu liu-husi MSSI prevee hodi halo pagamentu ba benifisiáriu BdM-JF ho montante hamutuk $10.263.950.00.