Enkuantu, antes ne’e Ministériu Solidariedade Sosiál no Inkluzaun (MSSI) ne’ebé iha ona ekipa hodi halo reajustamentu ba dadus Bolsa da Mãe Kondisionál no konsege rejistu benifisiariu hamutuk 41,462 ne’ebé mai husi Munisípiu 12 no Rejiaun Administrativa Espesiál Oekuse Ambeno (RAEOA).

Diretór Nasionál Asisténsia no Sosiál (DNAS), Fernando dos Reis hateten, prosesu pagamentu Bolsa da Mãe Kondisionál ba benefisáriu sira iha munisípiu sira termina ona iha fulan Dezembru nia laran iha tinan 2023. No pedidu ne’ebé MSSI haruka ba Banku Nasionál Komérsiu Timor-Leste (BNCTL-sigla Portugés) benefisáriu hamutuk 41.462, husi benifisiariu hirak ne'e BNCTL konsege halo pagamentu ba benifisiáriu 40,112.

“Prosesu pagamentu ba Bolsa da Mãe Kondisionál ba tinan 2023 terminadu, no pedidu ne’ebé MSSI haruka ba BNCTL hamutuk 41.462, husi benifisiáriu ida ne’e banku konsege selu de’it 40,112,” dehan Diretór Fernardo, iha nia kna’ar fatin Kaikoli, Segunda (08/01).

Diretór afirma, no orsamentu ne’ebé Ministériu prevé ba programa bolsa da Mãe kondisionál ho montante hamutuk $4,565,640.00 ne’ebé uza hodi halo pagamentu, maibé husi orsamentu refere banku uza de’it 4,404,120.00 hodi halo pagamentu.
Diretór salienta, benifisiáriu bolsa da mãe kondisionál tuir dekretu lei katak ba pagamentu ba kada benifisiáriu fulan ida ho montante $5 ne’ebé tinan ida dala ida. No benifisiáriu ne’ebé asesu ba programa refere hahú husi idade 0 ate 17.
“Kada labarik ida sei simu subsídiu $5 dolar fulan ida, maibé tinan ida foin halo pagamentu ba benefisáriu sira no ba bolsa da mãe kondisionál ne'e iha rekézitu lubuk ida atu entrega ba benefisáriu sira,” dehan Diretór.
Enkuantu, benifisiáriu ne’ebé la hetan pagamentu iha na’in 52 tama iha konta rezeitadu, 69 konta bankária taka tanba idade liu ona, 555 konta rezeitadu uza produtu poupansa ordináriu, konta nulu 674.