Ministra Edukasaun (ME), Dulce de Jesus Soares hatete, ho Ensinu Baziku ne’e Filiál entaun ME sei jere prefesór iha agrupamentu nia laran hodi apoia ba malu.
Nune’e mós ba profesor sira ne’ebé iha EBF sira seluk atu apoiu tanba profesór balun nia oras hanorin iha semana ida nia laran seidauk to’o oras 24. Tan ne’e ME iha ideia no dalan barak atu rezolve situasaun sira hirak ne’e.
“Tanba eskola ne’e la hamriik mesak nia mai husi EBS ida ne’ebé kompostu husi filiál barak, maibé ha’u fiar katak ME halo atuasaun ona, karik la’ós iha ne’ebá de’it maibé iha fatin seluk mós hanesan. Maibé ami iha maneira atu halo atuasaun hodi garante katak estudantes sira sei kontinua prosesu aprendisazem,” dehan Ministra iha Edifisiu ME Vila-Varde, Tersa (09/01).
Ministra esplika, eskola Osso-Uaque antes ne’e eskola kátolika ida maibé sira taka tiha hodi muda fali ba Públiku, no eskola ne’e mós antes iha profesór permanente na’in tolu maibé na’in rua muda tiha ba EBS entaun hela na’in ida de’it.
“Momentu ne’ebá iha professor permanente na’in tolu maibé tanba mosu dezentendementu na’in rua fila-fali ba Ensinu Báziku Sentrál no hela profesór permanente ida no apoiu husi kontratadu sira,” dehan Ministra.
Ministra haktuir, iha semana ida liu bá mosu uluk informasaun ne’ebé hanesan, tan ne’e sub inspetór husi ME nia ba to’o iha eskola refere hodi rezolve ona, maibé dadaun ne’e akontese fila-fali tan ne’e ME iha ona dalan seluk atu rezolve.
Eis Koordenadór Anacleto Germano Pereira de Carvalho hatete, sira kumpri desizaun husi ME tan ne’e sira labele hanorin tan estudante sira iha tinan 2024 nian tanba sira nian kontratu remata ona. Ho nune’e profesor kontratadu sei la hanorin iha tinan 2024, no hein to’o bainhira Ministériu Edukasaun foti ona desizaun ba sira nia estatuto foin hanorin fila-fali.
“Ami sei la hanorin tan estudante sira tanba antes ne’e Ministra Edukasaun ninia deklarasaun fó sai ona katak profesór kontratadu ne’ebé kontratu remata iha loron 31 fulan Dezembro tinan 2023 sei labele hamriik tan iha estudante nia oin hodi hanorin estudante sira bainhira seidauk iha desizaun,” dehan Eis Koordenadór ba Jornalista INDEPENDENTE Online liu husi Via telefone, Kinta (04/01).
Eis Koordenadór haktuir katak, antes ne’e sira mos fó sai ona informasaun iha média sosiál liu husi Faceboof katak eskola refere sei segel ka provizoriomente taka lai tanba iha EBF Osso-Uaque maioria profesór kontratadu.
Maibé nia dehan, liu husi publiksaun refere dirijente husi Ministériu Edukasaun no Diretór Servisu Edukasaun Munisípiu Baukau ba halo ona konfirmasaun no foti dadus eskola hodi sei aprezenta iha Gabinete ME tan ne’e sira sei hein hela.
“Ohin ami hato’o ona ami nia preukupasaun ba dirijente sira maibé sira mai hola de’it dadus hodi halo relatóriu no sei lori ba hato’o ba Ministra no nia Gabinete no nune’e ami sei hein ninia rezultadu,” dehan Eis Koordenadór
Tan ne’e konaba inskrisaun foun mós sira labele atende hotu tanba sira la iha ona direitu atu halo aktividade eskola nian, no sira mós hatete sira mós lakohi atu halo servisu ne’e tanba orsida sira halo hotu servisu hirak ne’e seluk mak simu fali osan.
Nune’e mos ba inskrisaun foun 2024 nian dadaun ne’e koordenadór eskola atuál de’it mak atende, tanba iha eskola refere iha profesór nain hitu (7) kompostu husi profesor permante na’in ida no komtratadu na’in neen (6).
“ami na’in neen ne’e profesór kontratadu hotu, no koordenadór ne’e mak funsionáriu permanente maibé foin dadauk iha Janeiru 2023 mak destaka fali mai iha ne’e tan ne’e ami la bele simu halo servisu seluk hanesan inskrisaun ba estudante foun tanba ami-nia kontratu remata ona, orsida ami halo hotu tiha sira seluk mak simu osan fali.
Professor Anacleto hamutuk Professor kontratatu sira seluk ne’ebé hanorin iha Ensinu Báziku Filiál (EBF) Osso-Uaque sira mak sai hanesan mós fundadór ne’ebé harii eskola ne’e iha tinan 2019, maibé dadaun ne’e sira labele halo aktividade eskola nian tanba kontratu remata ona.
Enkuatu, Ensinu Báziku Filiál Osso-Uaque iha sala de aula neen (6) no estudante hamutuk 151.