Diretór Eskola Sekundária Jerál 05 de Maio Adelino Nicolau Ornai hatete, orientasaun ne'e hanesan ambiente eskola nian, ba iha orientasaun laloos hanesan militár siran-nian maibé, orientasaun ida hanesan prepara sira-nia mentalidade no mós atu fó koñesimentu ba iha Eskola Sekundária 05 de Maio.
"Orientasaun ida ne'e la’os uza físiku maibe atu prepara sira-nia mentalidade hodi koñese ambiente eskola nian." dehan nia ba Online INDEPENDENTE iha nia knaar fatin Becora, Tersa (09/01)
Nia dehan orientasaun durante Loron tolu hahú iha tersa to’o kinta-feira no iha loron sesta konituna preparasaun ba misa abertura ba Ano letivu 2024 iha segunda feira semana oin eskola hahú la’o loos ona.
Tuir orientasaun husi Ministériu Edukasaun (ME) ba Eskola Sekundáriu Jerál 05 de Maiu katak, tinan 2024 simu de’it estudante hamutuk 360. Estudante foun hirak ne'e kompostu husi mane hamutuk nain 178 no feto 144.
"Entaun durante ne'e ami simu estudante hamutuk 360, ami fahe ba programa rua mak hanesa Siénsia Teknolojia iha sala haat no Siénsia Sosiais no Humanidade iha sala haat,no la bele liu maibé menus husi ida ne'e bele" dehan nia.
Enkuanto Formasaun sira ne'ebé halo iha fatin fahe husi oradór sira mai husi Ministériu Edukasaun, Polísia Eskuadra Bekora, Autoridade lokal Xefe Suku ,no Dirijente Eskola 5 de Maio rasik.
Iha fatin seluk, Xefe Gabinete Apoiu Tékniku Eskola Sekundária Jerál 12 Novembru, Kanisius Elu hatete, lala’ok orientasaun ida agora la hanesan tinan uluk, agora orienta estudante foun sira ho tipu edukativu oinsá atu eduka estudante sira.
"Bainhira ami simu orientasaun husi ami-nia dirijenti sira através husi Edukasaun Munisípiu Díli katak alunu sira sei hetan orientasaun maibé ho tipu edukativu," informa nia.
Nia dehan, tanba ne’e tenke evita krime sira ne'ebé fo impaktu la di’ak, maibé tau importánsia ba sira-nia koñesimentu edukasaun, profesór tantu alunu tuan balun iha tempo orientasaun sira halo akompaña.
"Ne'ebe ami hotu-hotu informadu tiha ona kona ba lala’o sira ne'e oráriu iha hotu ona,hein halo tuir oráriu ne'ebé eskola preparadu ona" Dehan nia
Nia afirma,eskola 12 Novembru tuir lolos simu estudante ho estandar husi Ministériu Edukasaun ne'e tenke estudante foun hamutuk 585,maibé to'o agora estudantes foin to'o 297.