Tema ne’ebé foti ba enseramentu kampana ativismu ne’e mak ‘Hamutuk ita prevene violensia hasoru feto no labarik feto iha Timor-leste’.

"Ohin loron ne'ebé importante tebes tanba ita bele halo enseramentu ba ita-nia kampana ativismu kontra violensia hasoru feto no labarik feto sira, ne'ebé ita halo tiha abertura iha 26 Novembru iha suku Builale, Pastu Administrativu Ossu," dehan Sekretáriu Estadu Igualdade Interinu no atual Sekretariu Estadu Komunikasaun Sosial, Expedito Dias Ximenes, iha Jardin Prizaun Bekora, Tersa (10/12).

Tuir nia, desde abertura iha 26 Novembru, Sekretáriu Estadu Igualdade hamutuk ho parseiru sira hotu servisu maka'as iha loron 16 nia laran hodi halo sosializasaun no dezamina informasaun sira, seminariu no atividade oioin ne'ebé di'ak liu tan hodi prevene violensia bazeia bá jeneru, liu-liu violensia domestika no seluk tan.

Expedito dehan, sosializasaun ne'ebé mak durante ne’e Governu halo di’ak tebes hodi konsosializa komunidade sira katak violensia sira ne’e violasaun direitus umanus no krime hakanek ema-nia fuan no fó presaun ba ema-nia moris.

Tan ne’e, ema hotu labele tolera hahalok sira ne'ebé mak halai ba iha aktu violensia hasoru feto no labarik feto sira iha Timor-Leste.

"Ita hotu hatene katak Estadu no Governu adopta ona lei kontra violensia domestika númeru 7/2010, loron 10 Juñu, tanba ne'e ho lei ne'e, ema barak mak iha ona konsiensia, ema komesa hato'o keixa bainhira hatene violensia ne'e akontese," nia dehan.

Iha fatin hanesan, Vise Ministra Soliedariedade Sosial no Inkluzaun (MSSI), Ceo Brites hatete, violensia ba feto no labarik feto hanesan krime publiku, tanba ne'e husu ba ema hotu atu servisu koletivamente hodi haforsa promosaun Igualdade jeneru, liu-liu kria programa no estratejia sira hotu hodi hapara violensia hasoru feto no labarik, inklui ema ho defisiensia.

Tuir nia, ema hotu ne'ebé moris iha sosiedade iha direitu atu moris livre husi violensia ho tipu saida de'it hodi bele kontribui ba dezenvolvimentu nasaun nian.

Diretór Jerál Protesaun Sivil, Autoridade Munisipiu Dili, Jacinto Freitas hatete, tema ba enseramentu ne’e ninia objetivu importante tebes, tan ne’e husu SEI habelar tan iha Postu Administrativu sira ne'ebé mak seidauk hetan informasaun oinsa mak bele hamenus violensia domestika.

"Ba oin se bele sensibiliza nafatin atividade sira ne'ebé iha ba komunidade sira ne'ebé seidauk hatene ka koñese kona-ba violensia sira," nia dehan.

Entretantu, iha marsa ba dame ne’e hetan prezensa Embaixadora Australia, reprezenta Embaixador Malazia, PDHJ, Marie Stopes Timor-Leste, funsionariu SEI, estudante UNITAL, no komunidade sira.