Tuir Xefe Governu ne’e, saida mak Lúcio Galhos halo ne’e nu’udar ezemplu di’ak no fó inspirasaun ba joven sira iha Timor laran tomak.

“Parabéns tebtebes tanba ida ne’e mak hatudu duni hanoin ne’ebé mak ita hakarak katak joven Timor-oan sira bele assume no hala’o. Ita-boot sai ezemplu no sai hanesan inspiradór ba joven sira hotu iha Timor tomak,” dehan Xanana liu husi komunikadu ne’ebé INDEPENDENTE asesu husi media gabinete Primeiru Ministru, Tersa (10/12).

PM Xanana sente kontente tanba investimentu ida ne’e la’os de’it haki’ak manu no fahi maibé mós iha buat sira seluk.

Ida ne’e duni maka Governu Konstitusionál dasia atu dudu ho liafuan nune’e ‘dudu dezenvolvimentu ekonómiku ne’ebé sei kria empregu’ tanba labele hein de’it husi rai li’ur.

Xefe Governu husu Ministru Komérsiu no Indústria, Filipus Nino Pereira, atu bele vizita hodi haree no tau-matan ba investimentu ne’e tanba ida ne’e importante tebtebes.

“Ha’u to’o iha ne’e kontente tebtebes haree manu inan iha 12.000 ho produsaun manu tolun kada loron bele atinje 12.000 liu. Kapaas tebtebes,” dehan PM Xanana.

Xanana mós sente kontente tanba Timoroan ida ne’e iha intensaun atu ba espanda tan iha fatin seluk iha Timor-Leste. Apresia tanba iha esperiénsia ne’ebé furak tebtebes, hahú ho bu'at ki'ik loke dalan fali ba bu'at seluk.

Ho ida ne’e maka Xefe Governu sei aprezenta iha reuniaun Konsellu Ministru iha 11 Dezembru 2024 atu bele haree ezemplu husi Timoroan ida ne‘e.

Governu mós iha ona hanoin atu estabelese Banku Nasionál Dezenvolvimentu hodi ajuda empreza Timor-oan sira bele asesu bá kréditu. Kréditu ne’ebé mak la’ós atu hatama tán osan, maibé ajuda empreza sira bele dezenvolve an.

Na’in ba kompañia Galhos Internasionál, Lúcio Carlinho Galhos Cardoso moris iha Dili iha tinan 1997 ho inisiativa rasik investe iha seitór produtivu ida ne‘e.

Lúcio nia aman husi Bobonaro, inan husi Dili no hahú eskola Primária klase 4 iha Norte Irlanda iha tinan 2005 to‘o universidade frekuenta kursu iha konstrusaun área enjeñaria, ikus mai muda fali ba iha Business Economic Marketing.

Muda tanba Lúcio interese liu ho business nu’udár toman ida desde ki'ik halo ona negósiu no bainhira iha Norte Irlanda mós halo ona negósiu hanesan fa‘an roupa, inklui hatama roupa ba Australia, Inglatera no nasaun seluk tán.

Ho ida ne‘e mak iha tinan 2018, Lúcio foti desizaun atu halo investimentu iha Timor-Leste ho negósiu dahuluk mak hatama roupa no seluk tan. Iha tinan 2021 loke tan Lumi Padaria hodi tunu paun ba komunidade iha munisípiu hotu.

Husi negosiu kiik sira ne‘e Lúcio enfrenta fallansu barak, maibé nunka halakon nia vontade atu kontinua aprende buka negósiu seluk.

“Agradese bá Primeiru-Ministru Avó Nana tanba sempre marka prezensa desde inísiu ha’u loke negósiu hodi tulun ami ho apoiu morál to‘o agora. Ami rua ha’u nia kaben hakarak atu banati tuir ita nia ain fatin no ezemplu,” Lúcio agradese.

Inspirasaun atu loke investimentu haki‘ak manu ne’e mai husi Lúcio nia tiun iha Jogjakarta-Indonézia ne‘ebé mak haki‘ak ayam petelur ho nia esperiénsia boot, nune‘e nia tenta halo estudu, aprende husi youtube, vizita ba tiun nia manu luhan iha Jakarta ho populasaun 400.000.

“Ha’u nia tiun mós fó-hanoin mai ha’u katak iha kualkér negósiu sempre iha risku. Tenke brani halo atu bele hatene ninia rezultadu,” nia konta tuir.

Tan ne‘e maka iha tinan 2023 hahú koko hodi halo konstrusaun manu luhan iha ne‘e no agora iha ona manu inan 13.000 ne‘ebé tolun kada loron atinje 12.000-resin no mós iha mákina produsaun pakan ho kapasidade tonelada ida iha oras ida nia laran.

Produsaun pakan ne’e atu bele hakmán haki’ak-na‘in sira atu labele fó han animál ho sistema tradisionál nune‘e fulan neen de‘it bele fa‘an ona animál.

Iha futuru Lúcio hakarak atu halo espansaun bá iha munisípiu, sei aumenta kapasidade manu luhan no aumenta produsaun pakan, maibé aproveita husu Primeiru-Ministru tanba hanesan timoroan, hanesan joven inovativu mai ho finanseiru oitoan, hakarak atu asesu kréditu iha Banku.

“Agradese bá BNCTL tanba fó ona krédtiu atu bele atinje ami-nia mehi katak, ita labele sai dependente bá importansaun. Tanba manutolun ne‘e produtu báziku liu ema hotu presiza konsumu. Atu atinje mehi ida-ne’e presiza atu la’o hamutuk ho parseiru sira no banku hodi bele halo espansaun,” nia agradese.

Kompañia Galhos Internasionál oferese ona kampu servisu bá ema na’in 87 no iha mehi hakarak atu fó servisu bá timoroan 1.000 iha futuru. Mehi ida-ne’e Lúcio fiar katak sei realiza iha tempu barak ho vontade no sakrifísiu, tanba hakarak atu suporta planu Governu nian.

Iha fatin hanesan, Xefe Suku Lauhata, Daniel dos Santos lori komunidade suku ne’e nia naran hato’o bem vindo bá Primeiru-Ministru, Kay Rala Xanana Gusmão ne’ebé hakat mai to’o iha fatin ida-ne’e, hodi mai haree direta investimentu haki’ak manu no fahi.

Autoridade lokál ne’e kontente tebtebes tanba investimentu ida-ne’e maski foin hahú maibé bele emprega ona komunidade lubuk ida husi suku ne’e.

Hanesan autoridade lokál husu Xefe Governu atu bele buka tán investór sira ho atividade seluk atu mai investe iha ne’e, tanba suku ne’e ninia área no populasaun boot tebes.