Koordenadór Komisaun Ezekutiva Zona Ekonomiku Espesial Oekusse-Ambeno (ZEEDOA), João Gonçalves hatete, nia parte hanoin hela atu deklara Oeskusse sai free trade zone ka zona livre no harii mós parke industrial.

"Prioridade ne'ebé mak ami hanoin ida mak atu deklara Oekusse free trade zone ka zona franka, ida seluk mak atu estabelese parke indústrial ida iha Oékusse," dehan João hafoin hasoru-malu ho Primeiru Ministru, Kay Rala Xanana Gusmão, iha Palásiu Governu, Tersa (10/12).

Ida ne’e, nia dehan, tama iha planu ZEEDO nian, ne’ebé sei presiza halo estudus viabilidade no orsamentu.

"Ami halo hela planu indikador ne'e, konserteza ke aban bainrua ami kuandu osan iha halo ona estudu viabilidade entaun ami bele halo ona planu detailada no Planu Estratéjiku Dezenvolvimentu Oekusse-Ambeno ba to'o iha 2030 nian," nia dehan.

Aleinde ne’e, nia dehan, nia parte identifika ona matéria prima ne’ebé Oekusse iha hodi bele prosesa molok exporta ba rai liur. Potensia ida ne’ebé ZEEDO haree mak bamboo.

"Oekusse potensia boot par ita halo mós ida iha ne’ebá, ne'ebé agora ami komesa halo ona Inisiativa, ami iha mós akordu kooperasaun ho Institutu Bamboo iha Tibar par sira apoiu ho viveirus, ho buat sira ne'e hotu, ami prepara tiha ona, sei fahe ba populasaun."

Materia primaria seluk, nia dehan, mak nehek metan nia knuk, ne’ebé exporta ona ba Nusa Tengara Timur, ho kuantidade rihun 60 tonelada kada tinan.

"Ami ko'alia tiha ho ema ne'ebé sosa (nehek metan nia knuk) par se bele nia mai loke de'it fabrika ida iha Oekusse. Inves de ita exporta ba iha rai li'ur, nia mai iha Oékusse halo fabrika, tanba ita iha vantajen boot ida ne'ebé Indonézia laiha no Austrália mós laiha," katak nia.