Diretor ezekutivu Konsellu imprensa (KI) Timor-Leste, António Dias hatete, Konsellu imprensa atribui karteira profissionál ba jornalista iha tinan ida hala'o ba dala-rua, totál jornalista Timoroan na’in 16 mak hetan rekuinesimentu husi estadu liu husi konsellu Imprensa atribui karteira Profissionál.

Nia informa, dadaun ne'e jornalista Timoroan ne'ebé  hetan ona karteira profissionál husi Konsellu Imprensa nu'udar rekuinesimentu estadu ba jornalista sira hamutuk 443 ital halo servisu  iha media oin oin.

“Konsellu Imprensa halo atribusaun karteira Profissionál ba Jornalista Timoroan iha tinan ida ne'e Jornalista hamutuk nain 16, husi númeru ida ne'e sira hamutuk ho jornalista sira ne'ebé hetan uluk ona karteira profissionál hamutuk 443 ital jornalista Timoroan mak  hetan ona rekuinesimentu husi estadu liu husi konsellu Imprensa atribui karteira profissionál hala'o servisu jornalismu iha media 31 ne'ebé eziste iha Timor-Leste,” Dehan António, nia intervensaun iha serimonia atribusaun karteira Profissionál ba Jornalista Timoroan nain 8, iha Salaun Konsellu Imprensa Kintal bo'ot (10/12).

 Nia informa, journalista Timoroan hamutuk 443 ne'ebé hetan ona karteira profissionál, maibé  jornalista na’in 63 mak hetan suspensaun, tanba inkompatibilidade envolve ona iha vida polítika, tanba Jornalista ne'ebé hetan karteira profissionál hamutuk  380 ital mak dadaun kontinua halo servisu jornalismu.

“Entaun ohin hahú ona ita boot sira goza personlidade jurídika ne'ebé Estadu legaliza ita boot sira nu'udar jornalista. Tanba ne'e rekonesimentu ida ne'e husi estadu ba ita boot sira hanesan ema profissionál, agora ba oin ita boot mak sei hatudu ita nia profissionál iha sosiadade, tanba Jornalista servisu dinamiku tebes, ita boot sira buka atu adopta aan nafatin informasaun sira ne'ebé iha mudansa teknolojia ohin loron lalais tebes,” Nia hatete.

Nia afirma, Konsellu Imprensa hein katak, prezensa aumenta jornalista Timoroan, maibé  tenki hadia di'ak liu tan kualidade informasaun, agora ba oin luta kontra des-informasaun ne'ebé buras iha téknolojia ohin loron.

“Hahú ohin, depois ho ita boot sira nia servisu sei sertifika ita boot sira nia marka iha  sosiadade, iha envolvimentu vida jornalismu nian no hadia kualidade informasaun iha media ne'ebé ita boot sira halo servisu ba hanesan Jornalista,” Nia afirma.

Iha fatin hanesan, Prezidente Konsellu Imprensa Timor-Leste, Otelio Ote afirma, konsellu Imprensa atribusaun karteira Profissionál  ba Jornalista sira, nu'udar rekuinesimentu husi estadu, tanba ne'e Jornalista tenki valoriza Karteira Profissionál.

“Ha'u simu informasaun husi Uniaun Profissional Jornalista Timor-Leste (UPJTL),  hamosu duvida ida katak, husi jornalista kona-ba karteira Profissionál nia valor no funsaun saida, depois ha'u dehan jornalista kuandu uza karteira Profissionál mak sente la vale, di'ak liu lalika  atribui karteira Profissionál nia,  ha'u hatan ba sira katak, se Karteira Profissionál ne'e la vale ne'e, ita ida uza ne'e mak lakohi valoriza, entaun nia xave mak ida ne'e, Karteira Profissionál ne'ebé estadu liu husi konsellu Imprensa rekonesimentu ita, ne'e atu valoriza ne'e sai mihis tiha,” Nia haktuir.

Maibé tuir nia, karteira profissionál ne'e nu'udar rekonesimentu estadu katak,  iha ona profisaun ida naran jornalista bele justifika loron ida ema verifika nu'udar jornalista duni ka lae?, tanba ne'e  ohin simu karteira profissionál ne'e la sente, maibé loron ida sei sente, tanba ida ne'e rekonesimentu husi estadu.

“Prosesu atribusaun karteira profissionál ne'e la'ós buat fasil para jornalista sira mai rejistu, atu hetan karteira Profissionál ne'e, maibé hakat liu prosesu hahú husi kolokiu, depois tuir tan ezame  aptidaun hotu, hetan  desizaun iha Konsellu omologa tiha, foin bele atribui karteira profissionál, tanba ne'e ha'u husu ba jornalista Timoroan sira ne'ebé hetan karteira profissionál tenki valoriza ne'ebé estadu rekoñese ba ita nu'udar professional,” Nia konklui.

Iha fatin hanesan, Jornalista Ajénsia Tatoli,I.P, Filomeno Martins, agradese  ba Konsellu Imprensa bele atribui ona karteira profissionál ida ne'e ba jornalista Timoroan hanesan rekuinesimentu husi estadu  hodi justifika lolos jornalista.

Maibé  tuir nia, profissional ne'e defende ba ema ida idak nia hakerek no sosiadade mak sei haree.

“Ha'u representa kolega ami na’in 8 hato'o agradesimentu ba konsellu Imprensa ne'ebé representa  orgaun regulador Komunikasaun Sosiál husi estadu hodi rekuñese ami nu'udar jornalista, atu ba oin hatudu kualidade di'ak ne'e defende ba ami nia publikasaun sira iha sosiadade mak sei haree,” Nia  Subliña.

Entretantu, jornalista Timoroan nain 8 ne'ebé hetan  simu karteira profissionál husi Konsellu Imprensa  Timor-Leste kompostu husi Jornalista Jornál INDEPENDENTE nain rua, RTTL,E.P na’in tolu, Tatoli,I.P nain-Ida no media Labeh na’in rua.