Sekretariu Estadu, Rogerio Araujo Mendonça hatete, asina MoU ne’e marka signifikativu ba viajen koletiva ba igualdade jéneru no empoderamentu feto nian.

"Asinatura nota intendimentu ne’e ho entidade Nasoens Unidas ba Igualdade Jéneru no Hakbiit Feto hanesan testamentu ida ba ita-nia kompromisu hamutuk atu kria Timor-Leste ida ne’ebé ekuitativu no inkluzivu liu," deklara SE Rogerio iha ninia diskursu hafoin asina MoU, iha salaun SEFOPE, Kaikoli, Tersa (26/11).

Liu husi parseria ida ne'e, nia hatutan, SEFOPE hakarak hakbiit feto ekonómikamente hodi fó asesu ba feto sira ba formasaun profisionál barak liu tán.

Aliende, oportunidade empreendedorizmu, nia dehan sei fó kbiit ba feto sira atu kontribui ba nasaun nia kreximentu ekonómiku no promove igualdade jeneru.

“Ami sei servisu hamutuk atu dezafia estereótipu jéneru no diskriminasaun hodi garante katak feto no labarik-feto sira iha oportunidade hanesan iha aspetu hotu-hotu moris nian."

Liu husi asina MoU ne'e, SE Rogerio hatutan, hametin partisipasaun iha forsa traballu hodi investe iha abilidade no kapasidade feto nian.

"Ita sei hasa’e sira-nia partisipasaun iha forsa traballu no kontribui ba ekonomia ida ne’ebé produtivu no reziliente liu."

Kona-ba MoU ne’ebé asina, nia esplika, MoU ne’e trasa enkuadramentu ida ne'ebé komprensivu ba kolaborasaun ne'ebé foka ba área sira hanesan ekonomia kuidade, formasaun profisional, serbisu sazonal no mobilidade traballu, no advokasia politika.

Ba ekonomia kuidade, nia dehan, SEFOPE sei serbisu atu rekoñese no valoriza serbisu kuidadu nian, setór ida ne'ebé domina husi feto sira no promove polítika sira ne'ebé apoia kuidadu-na'in sira.

Iha area formasaun profisionál, sei habelar asesu ba programa formasaun profisionál ho kualidade ba feto sira hodi apoiu sira ho abilidade sira ne'ebé presiza atu hetan susesu iha forsa traballu.

Iha area serbisu sazonál no mobilidade traballu, nia dehan, sei asegura katak feto sira iha oportunidade hanesan atu partisipa iha programa empregu iha rai li’ur, enkuantu salvaguarda sira-nia direitu no moris di'ak.

Ba advokasia polítika, Sergio dehan, sei halo advokasia ba polítika sira ne’ebé promove igualdade jéneru no empoderamentu ekonómiku feto nian, tantu iha nivel nasionál no internasionál.

"Hodi servisu hamutuk, ita bele kria futuru ne’ebé nabilan liu ba feto no labarik feto Timor-oan sira hotu. Parseria ida ne'e mak instrumentu ida ne'ebé maka'as atu lori mudansa pozitivu no harii sosiedade ida ne'ebé justu no ekuitativu liu."

"Ha’u hakarak hato’o ha’u-nia agradesimentu sinseru ba UN Women, ba sira-nia kompromisu ne’ebé la nakdoko ba igualdade jéneru no empoderamentu feto.  Hamutuk, ita sei halo impaktu ida ne’ebé dura ba feto no labarik-feto Timor-oan sira ne’ebé sura labele, nia moris," katak nia.

Iha fatin hanesan, Xefe Gabinete UN Women Timor-Leste, Amy Nishtha Satyam hatete, hanesan onra boot ida marka prezensa iha asinatura nota entendimentu entre SEFOPE ho UN Women.

“SEFOPE hanesan UN Women nia parseiru importante liu, liu-liu iha tempu ida ne’e bainhira ekonimia Timor-Leste hanoin atu hasa’e nia forsa traballu kualifikadu. Liu-liu ita labele ignora feto sira,” dehan Amy.

Objetivu sira husi MoU, normalmente mós aliña ho prioridade sira husi governu konstitusional dasia, liu-liu objetivu pesoal sira iha area empre nian, formasaun profisional, ne’ebé tantu ekipa foin-sa’e sira, inklui feto foin-sa’e sira, ho abilidade, koñesimentu no atributu sira ne’ebé sesesariu ba empregu imediatu no iha impkatu pozitivu ba empre imediatu no iha impaktu pozitivu ba sira-nia isin.

Tuir nia, feto mak halo mudansa ba jerasaun ida tomak tamba gasta tempu barak liu ba labarik sira nia edukasaun, hahan no nutrisaun.

“Entaun bainhira ita muda feto ida nia moris, ita muda duni futuru umanidade tomak nian.”

Importante, tuir Amy, bainhira hanoin kona-ba dezenvolvimentu, hanoin mós kona-ba modelu sira ne’ebé sentradu iha feto.

“Ohin ita hatene katak dalan ida ne'ebé seguru atu dezenvolve ekonomia mak investe iha feto sira, moris-di'ak no empoderamentu ekonómiku. No ita hatene katak ida ne'e da'et ba labarik sira, ba família sira, lalais liu duké investimentu sira seluk,” dehan nia.