Ministra Soliedariedade Sosial no Inkluzaun, Veronica das Dores hatete, iha tinan ne'e, MSSI halo reajustamentu ba dadus hodi hetan total benefisiariu—labarik sira ne'ebe eskola—hamutuk na’in 68,699 husi 34,063 tutores ho total orsamentu tokon $7.012,716.
Benefisiariu ba Bolsa da Mae (BdM) kondisional, nia dehan, ho nivel edukasaun husi ensinu primaria ho total benefisiariu na’in 40.293 ho orsamentu tokon $3.868,128, nivel ensinu pre-sekundariu ho benefisiariu na’in 21.981 ho orsamentu tokon $2.373,948, no nivel ensinu Sekundariu ho benefisiariu na’in 6.422 ho osan rihun $770,640.
Razaun MSSI implementa pagamentu BdM kondisional ne'e bazeia ba alterasaun Dekretu Lei nu.18/2012, 4 Abril, ne'ebé kria dekretu lei BdM kondisional ho montante orsamentu bazeia ba nivel eskolar.
Nivel ensinu primaria $8 kada fulan ba kada estudante, ensinu pre-sekundaria ho $9 kada fulan ba kada estudante, ensinu sekundaria ho $10 kada fulan ba kada estudante, no estudante ho defisiensia sei hetán tan adisional $5.
"Objetivu husi subsidiu bolsa da mae kondisional ne'e atu tulun familia vulneravel sira atu bele apoiu oan sira-nia eskola, no oan sira bele remata sira-nia eskola ho di'ak," dehan Ministra Veronica liu husi konferensia imprensa iha salaun MSSI, Kaikoli, Tersa (26/11).
Pagamaentu ba BdM kondisional faze dahuluk hahú tiha ona iha fulan Jullu 2024. Pagamentu refere ba benefisiariu husi munisipiu 11 de'it, la inklui munisipiu Vikeke, Dili no Zona Espesial Atauro, tanba dadus sei iha prosesu verifikasaun.
Tan ne'e, total benefisiariu faze dahuluk nian hamutuk na’in 54.688 husi tutores hamutuk 26.713 ho total orsamentu tokon $5.580,960.
Ba pagamentu faze daruak, nia dehan, sei hahú iha 2 Dezembru 2024 ho total benefisiariu na’in 14.008 husi tutores 7.350 ho total orsamentu tokon $1.431,756.
"Pagamentu ne'e sei hahú uluk husi Sukursal sira, depois kontinua ba iha suku, ba Munisipiu Vikeke, Dili no Zona Espesial Atauro, inklui mós ba benefisiariu hirak ne'ebé hasoru problema iha faze primeiro nian husi munisipiu 11 ne'e."
Ho nune'e, Ministra apela ba inan-aman ka tutor sira atu utiliza osan ne'e ba oan sira nia eskola, atu bele dezempeñu eskolar ne'ebé di'ak hodi bele remata eskola ho di'ak.
"Apela atu inan-aman uza osan ne'e ba oan sira nia nessidade eskolar nian no oan sira tenke eskola no tenke remata eskola, liu-liu remata ensinu sekundaria, espesialmente ba alin no oan feto sira," Ministra ne’e husu.
Tuir nia, edukasaun mak ponte atu hakat ba futuru ne'ebé di'ak liu, edukasaun mak ponte hodi asesu ba oportunidade servisu no aprendendizajen seluk-seluk tan ne'ebé di'ak liu, no edukasaun mak sei tulun kore an husi ki'ak.
