Líder nasionál ne’e husu bá joven sira atu labele see tilun bá boatus oioin ne’ebé hafahe Timoroan nu’udár maun ho alin no husu atu haluha pasadu hodi hateke bá dezenvolvimentu nasaun no moris di’ak povu nian.

“Husu ba joven sira atu haluha tiha buat ne’ebé akontese iha pasadu hodiita hamutuk iha armonia nia laran, bele hateke ba rai no povu ida ne’e. lalika se tilun b alia-fuan oioin ne’ebé hakarak hafahe ita, tenke haree dook,” dehan PM xanana ba jornalista sira hafoin partisipa serimónia komemorasaun Proklamasaun Independénsia bá dala-49, iha Kampu Prizaun Becora, Postu Administrativu Cristo Rei, Munisípiu Díli, (28/11/24).

Xefe Governu ne’e mós sita katak, Prezidente Repúblika Indonézia, Prabowo Subianto delega ninia reprezentante hodi partisipa iha komemorasaun tinan ne’e, nune’e jenerál balun mós mai to’o Rejiaun Administrativa Espesiál Oecusse Ambeno (RAEOA) inklui bainaka espesiál balun hosi Malázia.

Xefe Governu konsidera ho prezensa bainaka importante sira ne’e hatudu katak ema sei fó konfiansa bá Timor-Leste.

“Ne’ebé nu’udar rai ida hatene haluha buat hotu ne’ebé akontese iba tempu uluk nian hodi hahú kria armonia no amizade atu hotu-hotu ko’alia ba malu kona ba oinsa dezenvolve rai no povu ida ne’e nia moris diak,”tenik PM Xanana.

Entretantu, delegasaun Indonézia ne’ebé partisipa iha komemorasaun restaurasaun independénsia iha RAEOA mak hanesan Jenerál (Ref) TNI Wiranto hanesan mós atuál Konsilleiru Prezidensiál, Tenente Jenerál TNI, Yoedhi Swastono nu’udár asistente segundu, Adi Warman nu’udár asistente primeiru, Kolonél Infantária, A. Suryo no Teten Nugraha nu’udár ajudante asistente ho membru delegasaun sira seluk hamutuk na’in 12.