Tuir komunikadu ne’ebé Online INDEPENDENTE asesu, Sekretáriu Estadu Komunikasaun Sosiál hala’o diálogu ho komunidade no autoridade lokál husi suku hitu ne’ebé pretense ba Postu Administrativu Vemasse, mak hanesan Suku Kaikua, Suku Loilubu, Suku Ostiku, Suku Vemasse, Suku Waigae, Suku Uato-Lari no Suku Ossoala.
Durante diálogu, autoridade lokál sira maioria hato’o difikuldade ne’ebé durante ne’e sira hasoru liuliu Estrada, bee moos, eletrisidade no rede telekomunikasaun ne’ebé halo sira sente izoladu tebes.
Autoridade lokál sira husu atu governu konsidera sira nia preokupasaun no husu atu governu sentral aprova orsamentu tuir planu ka nesesidade ne’ebé sira presiza liuliu hato’o ona husi postu no autoridade munisipál.
Autoridade lokál aprejenta mós problema kona-ba veteranus ne’ebé iha sira nia suku iha veteranu balu maka durante ne’e simu ona sira nia direitu no medalla, maibé ikus mai hapara tiha fali.
Espesifikamente ba Sekretaria Estadu Komunikasaun Sosiál, autoridade lokál sira husu atu estabelese sentru informasaun suku, tanba entre suku hitu ne’e suku Oegae de’it mak iha ona sentru informasaun suku maibé la efetivu.
Autoridade lokál sira husu atu sekretaria estadu komunikasaun sosiál organiza formasaun ba foinsa’e sira kona-ba jornalizmu atu nune’e foinsa’e sira bele hatene rekolla informasaun iha suku liga ho edukasaun, saúde, infrastrutura, agrikultura no seluk tan, prosesa no públika atu nune’e bele hetan atensaun husi governu.
Hatan ba preokupasaun hirak ne’e, Sekretáriu Estadu Komunikasaun Sosiál, Expedito Loro Dias Ximenes subliña, sei hato’o ba ministériu kompetente no halo relatóriu ba konsellu ministru.
Kona-ba preokupasaun sira liga ho sekretaria estadu komunikasaun sosiál, governante hatete, sei orienta parte tékniku sira rekolla informasaun klean liu tan liuliu kona-ba estabele sentru informasaun suku, rádio komunidade no distribuisaun jornal.
Iha okajiaun, Administradora Postu Administrativu Vemasse, Elda Maria Vegas de Sousa Freitas subliña, inisiativa hala’o serimónia hasa’e bandeira iha loron nasional sei hala’o rotativa husi suku ida ba seluk.
“Tinan ida ne’e, loron Proklamasaun hala’o iha Suku Ossoala, tinan oin sei hala’o fali ho suku seluk,” administradora hatete.
Suku Ossoala kompostu husi aldeia lima hanesan Kai-denulale Hoine-uai, Lolinuno Uai-khanassa no Uma-ana Iku.
Suku ne’e ho nia luan hamutuk 65,14 Km2. Jeografikamente iha aspeitu fronteira Suku Ossouala iha parte leste baliza ho postu administrativu Venilale Baucau parte norte ho Viqueque parte oeste ho suku Loilubu no parte sul ho Vemase no Manatuto. Tuir dadus demográfiku suku Ossoala Totál populasaun suku ne’e nian hamutuk rihun rua atus tolu tolunulu resin sia (2.339) ho Xefe-família, atus lima resin.
Populasaun sira iha Ossoala maioria moris nu’udar vida agrikultór hanesan halo to’os natar no haki’ak animal. Paisajen naturál suku Osoala idéntiku ho foho no kle’an tanba hale’u husi foho no iha área kle’an. Nune’e iha tempu rezisténsia fatin ne’e liman-kro’at no rezistente timoroan sira uza nu’udar fatin estratéjiku hodi halo gerilla kontra okupasaun ilegál Indonézia.
Entretantu, Iha ambitu sai Inpetór ba serimonia komemorasaun loron 28 novembru, Sekretáriu Estadu Komunikasaun Sosial lee diskursu Prezidente Repúblika nian hafoin rona gravasaun Prezidente Dahuluk Francisco Xavier do Amaral lee textu Proklamasaun Independénsia Unilateral iha tinan 1975.
Diskursu Prezidente Repúblika nian iha selebrasaun tinan-49 Proklamasaun Independénsia subliña liuliu kona-ba rekonsiliasaun no relasaun bilateral ho nasaun viziñu no nasaun hotu iha mundu.
Premiadu Nobel da Pas sita situasaun global no rejional ne’ebé hatuur dezafiu no esperansa sira ba dame. No konsidera momentu sira hotu inspira Timor-Leste atu duplika esforsu sira ba pás no estabilidade.
Xefe Estadu toka kestaun neen ne’ebé relevante iha situasaun interna ke esensial atu hametin dezenvolvimentu no moris di’ak, liuliu dezenvolvimentu sustentável no dezafiu sosioekonómiku; edukasaun, saúde no direitus umanus; integrasaun rejional no relasaun internasionál; soberania no jestaun ba rekursu naturais; dezenvolvimentu RAEOA no munisípiu fronteira sira.
Enkuantu, iha komemorasaun ne’e, komunidade no autoridade lokal sira simu ho entusiazmu Sekretáriu Estadu Komunikasaun Sosiál, Expedito Loro Dias Ximenes, akompaña husi Prezidente Rádio Televizaun Timor-Leste, Empreza Públika (RTTL, E.P.); José António Belo “Taraleu”, Diretór Diresaun Nasionál Promosaun Dezenvolvimentu Mídia Lokál (DNPDML), Adriano Monteiro; Diretór Centro de Formação Técnica em Comunicação (CEFTEC), Julio Lopes no Xefe Departementu Promosaun no Desiminasaun Informasaun (DPDI), Guida dos Santos.
Durante iha Ossoala, Sekretáriu Estadu fahe mós farda no bola-ain ba estudante sira. Nune’e mós fahe ba estudante sira iha Postu Administrativu Laleia nu’udar resposta ba pedidu husi professor sira iha tinan kotuk.
