Xefe Estadu hato’o kestaun ne’e iha ninia diskursu iha selebrasaun loron Proklamasaun Independensia Unilateral ba dala 49 ne’ebé realiza iha Palaban, Rejiaun Administrativu Espesial Oekusse-Ambeno.

Iha selebrasaun ne’ebé partisipa husi bainaka sira husi rai li’ur, inklui eis Jeneral Wiranto no Timor-oan sira ne’ebé hela iha Indonezia, PR Horta hatete, konflitu iha TL hahú iha Agostu 1975 tanba razaun oioin. Razaun ida mak radikalizasaun ideolojia ne’ebé hafahe Timor-oan sira no ikus mai hamosu funu sivil ne’ebé rezulta ema inosente lubuk lakon vida.

Hafoin prosesu naruk, nia dehan, iha tinan 1997/1998, Prezidente Indonezia, BJ Habibie, hahú prosesu atu rezolve problema Timor-Leste nian.

"Maibé, ita moris hetan susesu, ita moris iha nasaun livre ida, Tentara Nasionál Indonézia sira mós kontribui. Tanba sira fó dalan ba BJ Habibie atu halo reformásia iha indonézia, no kontinua rezolusaun problema Timor-Leste nian.”

“Ne’eduni, ita tenke rekoñese papél importante tebtebes TNI ne’ebé permite prosesu 1999 la’o ba oin, maske ho difikuldades hotu-hotu mak ita hatene, no sira mak mós tane reformásia iha Indonézia. Prezidente BJ Habibie sei moris nafatin iha ita nia memória, tanba ho nia, iha tempu ne’ebá halo negosiasaun ho Sekretáriu Jerál ONU, ho Portugál, hetan akordu Maiu 1999, depois Konsulta Populár," dehan Xefe Estadu ne’e, Kinta (28/11).

PR Horta hatete, Timor-oan sira fahe malu iha situasaun ne’ebé defísil duni, maibé sorte iha líder ida hanesan Kay Rala Xanana Gusmão hanesan Komandante Supremu Rezisténsia mak dada dalan ba rekonsíliasaun nasionál.

Ho Xanana nia matenek, Laureadu Nobel da Pas ne’e dehan, Xanana inspira no bolu Timor-oan tomak atu husik ba kotuk buat ne’ebé iha kotuk, passadu ba passadu.

“Ita ne’ebé moris tau-matan ba vítima. Vítima sira iha Timor-Leste hanesan vítima mós iha Indonézia," dehan PR Horta.

Tanba ne'e, lideransa vizionária Xanana nian hanesan loke dalan ba  maun-alin sira iha Indonézia.

“Sira ne’ebé uluk luta ba autonómia, sira hili desizaun ida atu hela ho Indonézia, maibé ita simu malu hamutuk.”

Maibé, tuir nia, kompatrióta sira iha ne’ebá barak mak hetan obriga atu hela iha Atambua, Kupang ka Sumatra no fatin sira seluk tanba situasaun.

“Situasaun mak obriga, sira mós halo parte istória komum. Maske dala-ruma ema haluha tiha tanba dala-ruma ema bele haluha tiha, sira sai nafatin iha sira-nia espíritu, sira-nia identidade, sira-nia sentimentu nu’udár Timor-oan”.

"Ne’eduni lalika halo julgamentu ba passadu. Lalika hanoin beibeik ba pasadu, tanba ita hakarak ko'alia ba pasadu, ko'alia kona-ba Agostu 1975 ka ko'alia kona-ba masákre Aileu, Same, no krize sira seluk iha ita-nia le'et rasik."

Tanba ne’e, Horta dehan, Xanana ne’ebé dada Timor-oan husi tinan 1981 ba oin, liu-liu liu husi periódu ida ne’ebé defísil, hatete laiha justisa iha vingánsa nia laran.

Xanana sobrevivente baze apoiu matebian, nia sai hanesan sasin ba konsikuensia ne’ebé mai husi radikalizmu ideolójiku Timor-Leste nian.

"Ne’eduni, hakuak fraternu ida ne’e tenke kontinua. Ita kontinua fó fuan, promove pás, dame, no mós seguransa iha rai ne’e. Ita-nia fronteira ne’ebé uluk haketak ita, oras ne’e simbóliza lasu unidade, kontaktu no rekonsíliasaun, no buat sira ne’e hanesan airin boot, pillár ba dezenvolvimentu ho progresu, bainhira ita prepara an atu tama ASEAN,” dehan Xefe Estadu ne’e.

Iha fatin ketak, Primeiru Ministru, Kay Rala Xanana Gusmão haktuir diskursu PR Horta nian ne’ebé husu ba juventude Timor-oan hotu atu haluha buat ne'ebé akontese iha passadu, kria armonia, hodi sai ida ne’ebé dezenvolve rai ida ne'e no povu nia moris di'ak.

"Ohin diskursu Prezidente Repúblika, José Ramos Horta, naruk tebes, husu ba juventude Timoroan hotu atu haluha tiha buat ne'ebé akontese iha passadu hodi ita hamutuk iha armonia nia laran, bele hateke ba rai ida ne'e no povu ida ne'e. Tanba ne'e ha'u husu lalika se tilun rona liafuan oioin ne'ebé hakarak fahe ita," dehan Xanana bainhira partisipa iha komemorasaun loron 28 Novembru, iha prizaun Bekora, Dili, Kinta (28/11).

PM Xanana dehan, komemorasaun 28 Novembru iha Oekusse hetan partisipasaun husi reprejentante mai governu Indonezia ne'ebé delega husi Prezidente Repúblika Indonesia, Prabowo, no iha mós reprezentante husi governu Malazia, ida ne’e hatudu katak ema fó konfiansa ba TL.

Konfiansa ne’e, Xanana dehan, tanba TL nu’udar rai ne'ebé hatene haluha buat hotu ne'ebé akontese iha tempu uluk nian hodi hahú agora kria harmonia no amizade atu ko'alia ba malu oinsa dezenvolve rai ida ne'e no povu ida ne'e nia moris.

“Tanba ne'e kona-ba prosesu rekonsilasaun entre Timor-Leste ho Indonézia, Prezidente Repúblika, José Ramos Horta, halo ona nia diskursu, ha'u lakohi ko'alia tan ida ne'e," katak nia.

Iha fatin hanesan, Vise Primeiru Ministru Mariano Assanami Sabino hatete, ohin momentu ida ba hotu-hotu atu halo reflesaun katak eroi sira oferese ona independensia no ohin tenke kuidadu par ukun rasik aan ne’e util ba ema hotu.

Rekonsilisaun no pas, tuir Assnami, nu’udar parte ida husi atu kuidadu ukun rasik aan, la halo separasaun ho laiha diferente. Presiza kuidadu nasaun ida ne'e ho hakmatek ho nasaun viziñu Indonesia ho Austrália.

“Tanba ne’e ema hotu tenke intera loloos katak, atu kontinua hatemik pás ho dame tenke halo opsaun polítika ne'ebé importante par asegura livremente ba jerasaun foun ba iha nasaun ne'ebé de'it pas, laiha odiu-vingansa ba malu.”

"Ita ne'ebé moris fó respeitu tomak ba ita-nia erói sira ne'ebé oferese sira aan ba mate hodi oferese indenpendensia no feto faluk, oan kiak sira hotu, ita tenke kuidadu, tanba sira mate, maibé sira fó nasaun ida Independente util ba futuru no ba jerasaun foun atu kontinua luta ba moris di'ak."