Iha semana kotuk, Lúcia Fereira (50), kontratu trabaladór ida, Natalino Soares, hodi fura bee iha ninia uma oin, iha aldeia Manu Aman, Suku Tapo-Memo, Postu Administrativu Maliana, Munisipiu Bobonaro.

Natalino konta, durante prosesu fura bee, nia ho nia kolega sira hasoru difikuldade tanba rai toos. Maibé sira kontinua esforsu hodi fura no konsege hakoi ona kanu polegada (inci) haat lolon tolu ba rai okos.

Iha 25 Novembru, hafoin kanu lolon tolu ne’e iha ona rai okos no sira hahú solda, teki-teki ahi lakan sai husi rai okos ne’ebé halo sira hakfodak.

“Ami fura bee hahú semana kotuk, ami kee tiha rai, depois ami hatun besi kanu rua no monta ona besi kiik atu hasoru rai henek, maibé la konsege, nune’e ohin dader mai atu atu solda besi boot, derrepente ahi lakan sa’e mai. Ha’u hanoin gazolina maka lakan, nune’e ha’u solda fali, ahi lakan nafatin, ho nune’e ami lori bee rega depois ami tau iskeiru ba ahi lakan nafatin,” dehan Natalino liu husi komunikadu imprensa ne’ebé INDEPENDENTE asesu husi gabinete Primeiru Ministru.

Hafoin ida ne’e, Natalino, Lúcia, ho komunidade balun no autoridade lokal kontaktu kedan ba Xefe Suku Tato-Memo, Joaquim Batista dos Santos, no Prezidente Autoridade Munisípiu Bobonaro, Alexandre Pires, hodi kontaktu Komandante PNTL Munisípiu Bobonaro, Superintendente Xefe Polísia, Agostinho Gomes da Silva, no autoridade Bombeiros hodi hala’o identifikasaun no hapara provizóriu atividade ne’e.

Hafoin rona katak mosu gas natural iha Manu Aman, Maliana, iha 26 Novembru ne’e, Primeiru Ministru (PM), Kay Rala Xanana Gusmão, hala’o vizita urijente hodi halo observasaun direta.

“Ha’u rona dehan gás mosu, ne’e mak ha’u mai haree direta. Ita sei husu ekipa Institutu Petróliu no Jeolojia Institutu Públiku ho ekipa bele mai halo identifikasaun klaru liu tán,” PM Xanana hatete.

Xefe Governu ne’e dehan, iha semana ne’e ekipa tékniku sei halo investigasaun sientífika no kolleta dadus jeolojia atu bele hatene informasaun klaru kona-bá gás, petróleu, rekursu minerál, bee no rekursu jeolójiku sira seluk.

Iha oportunidade ne’e, PM Xanana informa mós katak, durante ne’e Governu liu husi ekipa IPG identifika rikusoin Timor nian kompostu husi fatuk, ahu, fatuk potásiu, sulfuriu, besi musan, dolemite, osan mean, osan mutin, fosfatu, masin, gás naturál, jesu, kromite, clay ceramik, maganesite, bentonite arjila, maganesa, mármore, rai henek boot, infiltrasaun mina, kobra, volastonite no seluk tan.

"Ita identifika rikusoin ne'e lubuk ida, hahú peskiza iha Lautém no fatin barak tán hanesan Vikeke, Same no Kovalima ne’ebé iha mós iha gás naturál no rikusoin seluk tán,” dehan Xefe Governu ne’e.

Iha fatin hanesan, Prezidente Autoridade Munisípiu Bobonaro, Alexandre Pires, konsidera vizita Xefe Governu nian importante hodi motiva ekipa Institutu Petróliu no Jeolojia-Institutu Públiku atu tuun direta iha terrenu hodi halo peskiza kle’an.

Alexandre husu ba komunidade atu mantein kalma hodi koopera ho ekipa Governu nian ne’ebé sei halo peskiza kle’an.

Entretantu, Komandu PNTL mós dada kedan police line hodi bandu komunidade atu kontinua fura bee moos to’o ekipa Governu halo identifikasaun.