Diretór Ezekutivu interinu JSMP, Casimiro dos Santos hatete, iha artigu 160 Konstituisaun RDTL define katak krime sira ne’ebé kometidu husi tinan 1974 to’o 31 Dezembru 1999 konsidera nu’udar krime kontra umanidade, krime jenosídiu ka krime funu; fó fatin ba prosedimentu kriminál iha tribunál nasionál no internasionál.

Ida ne’e, nia hatete, signifika katak krime sira ne’ebé akontese durante períodu 1999 iha ámbitu konsultasaun populár ka referendu sei prevalese ba prosesu julgamentu durante seidauk iha alterasaun ba Konstituisaun.

JSMP fiar katak provizaun artigu 160 K-RDTL nu’udar orden no mandatu konstitusionál ne’ebé vinkula entidade estadu tomak no tenke respeitu, inklui Prezidente Repúblika. Até Prezidente Repúblika mak iha papél boot liu iha estadu TL atu defende no ezije entidade hotu-hotu kumpre prinsípiu sira ne’ebé konsagra iha K-RDTL.

Ba eis lider milisia Eurico Guterres, Casimiro dehan, nu’udar autór xave no determinante iha violasaun oioin, atrosidade no masakre sira iha Timor-Leste antes, durante no hafoin referendu.

Tanba ne’e, nia hatutan, unidade krime grave ONU akuza EG nu’udar autór ba krime kontra umanidade inklui omisídu, persegisaun no hahalok kruél dezumanu sira seluk.

“Até agora, Eurico Guterres sei konsideradu nu’udar akuzadu ba aktu atrosidade no krime kontra umanidade ne’ebé akontese durante no hafoin referendu iha Timor-Leste iha tinan 1999, no to'o ohin loron nia estatutu nu'udar arguidu seidauk hetan revogasaun, tanba ne’e Gabinete Prokuradória-Jerál Repúblika iha papél importante atu asegura no defende legalidade tuir lei,” dehan Casimiro liu husi komunikadu imprensa ne’ebé INDEPENDENTE asesu, Kinta (28/11).

Mezmu Eurico hetan ona prosesu julgamentu iha Tribunál Adhoc Jakarta, maibé prosesu ne’e hetan krítika maka’as husi entidade oioin iha tempu ne’ebá, tanba julgamentu ne’e diskonfia la priense padraun julgamentu justu tuir lei internasionál no prosesu ne’e rasik nu’udar esforsu no tentativa atu dezvia husi ezijensia ba tribunál internasionál.

“Áte (Profesor David Cohen, 2003), peritu famozu ida iha área direitus umanus lei internasionál no justisa tranzisionál, lansa krítika maka’as hasoru julgamentu kazu Eurico Guterres, no nia afirma katak julgamentu ne’e intensionalmente dezeña atu falla,” nia esplika.

Diretór ne’e dehan, eembora konsiente katak TL iha difikuldade no dezafiu boot atu lori autór prinsipál no autór intelektuál sira ba justisa, maibé estadu tenke respeita vítima no sobrevivente liu husi halo polítika ne’ebé dignu no fó onra ba sira, atu nune’e labele hakanek sira-nia sentimentu ba justisa.

Polítika ne’ebé Prezidente Repúblika no Primeiru Ministru inisia hodi konvida EG ho nia grupu ne’ebé envolve iha krime oioin iha pasadu la’os de’it ultrapasa limete Konstitusionál, maibé insulta no ofende vítima no sobrivivente sira ne’ebé terus no experensia tréjiku no nakukun iha pasadu.

“Rekonsiliasaun labele reprezenta de'it, perspetiva lideransa sira iha ukun ka poder, maibé tenke mai hosi vítima sobrevivente no povu ho povu”.

Ne’e duni, ho rekonsiliasaun tenke sai nu’udar ajenda nasionál ka ajenda estadu tomak, atu nune’e inisiativa hirak ne’e tenke liu husi mekanizmu própriu ho envolvimentu entidade no órgaun soberanu hotu-hotu, partikularmente PN nu’udar reprezente povu nian tenke diskuti no aprova ka ratifika molok PR no PM promove polítika ne’e.

Bainhira prosesu ne’e trata tenke ho transparente no inkluzivu, permite reprezentasaun lian vítima sira nian iha prosesu hirak-ne’e.

Tanba ne’e, nia dehan, inisiativa ba rekonsiliasuan labele kria impresaun hanesan inisiativa pesoal ka partikulâr husi lideransa ida-rua nian ne’ebé agora iha poder.

“Asuntu estadu nian tenke trata tuir regra protokulár no solenidade estadu nian, atu asegura prosesu sira efetuada tuir orden no iha ámbitu obrigasaun Konstitusionál,” dehan Casimiro.