Governadór BCTL, Helder Lopez hatete, BCTL tenke halo estudu hodi komprende lai vantazen no dez-vantazen uza dollar agora ka muda.

"Estudu lubuk ida ne'ebé halo ona, mas estudu bo'ot liu mak ami halo ho Fundu Monetáriu Internasionál rezultadu estudu ne'e espera sei sai antes tinan ida ne'e remata. Purenkuantu iha rezultadu pre-lemináriu husi estudu ne'e hatete bainhira ita uza dollar, ita bele asegura estabilidade katak dollar ninia valór ne'e di'ak tanba forte nune'e estabilidade ne'e iha.  Mas tanba ita uza dollar, ita la halo polítika monetáriu ne'e kestaun tékniku uitoan mas ha'u esplika jerál de'it, BCTL labele halo polítika monetáriu iha sentidu osan hira mak ita bele sirkula iha ekonómia, osan iha mak ita bele dada atu bele influénsia atividade ekonómika, tanba ita la halo ida ne'e, ita laiha fleksibilidade katak ita laiha instrumentu atu kontrola hanesan suplay osan iha ekonómia liu husi polítika monetáriu," dehan Governadór BCTL, Helder Lopez ba jornalista sira hafoin enkontru ho PR Horta iha Palásiu Prezidensiál Bairu-Pite, Kuarta (27/11).

Nia afirma, entaun estudu ne'e hatete uza dollar ninia vantajen mak estabilidade iha, mas nia dez-vantazen  mak laiha fleksibilidade tanba la halo polítika monetáriu.

Maibé, bainhira liga tiha sira ne'e ho serake uza dollar kontribui di'ak liu ba produtividade ekonómika ka la'e, estudu pre-lemináriu sira ne'e mós hatudu katak útiliza dollar ladun promove produtividade ekonómika, mas ida ne'e governadór ko'alia nivél altu de'it, hakarak ba detallu ne'e  tenke haree item pur item.

"Purenkuantu husi BCTL saida mak ami halo mak ami kontinua halo estudu hodi komprende lai ita ninia vantazen no nia dez-vantazen utilizasaun dollar agora, depois ita kontinua suporta governu ami halo nia parte oinsá ita dezenvolve ita ninia ekonómia, to'o iha pontu ida mak ita bele halo komunikasaun ho parte relevante hotu katak ita iha ona kondisaun atu ita bele konsidera sira kontinua ho dollar ka muda ba rejime foun entaun ida ne'e orsida ita tenke diskusaun ho di'ak depois mak ita halo desizaun," dehan nia.

Nia reforsa, mas mensajen prinsipál mak ne'e kona-ba moeda ba BCTL ninia pozisaun agora tenke halo estudu hodi komprende lai vantazen no dez-vantazen uza dollar agora ka muda.

"Ha'u hanoin ita halo estudu lai tanba moeda ne'e instrumentu ida ne'ebé ita uza iha ita ninia ekonómia, mas ita bainhira ita halo desizaun troka instrumentu ne'e nia efeitu ne'e bo'ot, tanba ne'e mak ita labele halo desizaun ida ne'ebé tanba de'it ita hakarak halo desizaun ikus mai ninia konsikuensia ne'e bo'ot liu-liu konsikuensia ne'e se mak sofre ita nia povu no ita nia ekonómia mak sofre ne'e ita lakohi," reforsa nia.

Tanba ne'e mak halo kuidadu didi'ak, halo estudu lai depois halo estudu ho instituisaun sira ne'ebé hanesan FMI atu rezultadu estadu ne'e kredebilidade ajuda duni atu hetan informasaun hodi halo desizaun loloos.

Osan sentavus ba nota

Entretantu, Governadór Banku Sentrál Timor-Leste (BCTL), Helder Lopez hatete, bainhira nia sentavus ne'e tenke osan besi, se bainhira hakarak ba surat tahan bolu dehan nota, tanba ne'e mak agora daudaun tanba uza dollar labele iha nota.

"Tanba uza nota ka dollar Amérika nian, imi nota ekonómia ida sentavus Amérika nian laiha ona, ita uza sentavus de'it, tanba sentavus ne'e mak hasai nota ne'e sei uza dollar Amérika ninian," nia afirma.

Nia esplika, planu BCTL ninian ne'ebé  tau ona  planu estratéjiku ba dezenvolvimentu setór finanseiru mak oinsá ita dijitaliza sentavus ne'e, nune'e bainhira ohin hatete pagamentu dijitál ne'e, bainhira ba selu sasan ne'e duké  lori osan besi sira ne'e mak ba selu, aban bainrua labele ba ho dijitál halo pagamentu mas prosesu sira ne'e la'o hela.

"Ami servisu hamutuk ho instituisaun finanseira, BCTL kria sistema infraestrutura buat ne'e fasilita ita ninia ekonómia, liu-liu ba ita bo'ot sira," hakotu nia.