Presidente Rede Feto Timor-Leste, Zélia Maria Fernandes hateten, ligadu ho asedu sexsuál iha servisu fatin, iha komisaun Fundasaun Públika iha ona dekreitu lei ka Sirkular tau zero toleransia ba asedu sexsuál iha servisu fatin.
"Entaun se mak atu halo Sosializasaun makas ba ida-ne'e rede feto nia parte ita halo advokasia, para hapara violénsia hasoru feto no labarik sira iha ne'ebé de'it inklui iha Servisu fatin,"dehan Presidente RFTL ba Jornalista sira iha Salaun delta Nova, Segunda (25/11).
Nia dehan alvu husi advokasia rede feto ba halo aproximasaun ho sira atu nune'e bele hetan solusaun tanba aktus hirak ne'e la'ós rede feto mak halo.
"Rede feto la bele fo solusaun, tanba la'ós rede feto mak Komete aktus hirak ne'e, entaun rede feto lori lian sira-ne'e ba aborda ho instituisaun relevante sira, oinsá mak fo solusaun, saida mak ita halo, ita ba kulia ho kompañia sira tanba kazu ida-ne'e mosu fila fali volénsia ka aktus iha servisu fatin,"nia dehan.
Nia informa rede feto lori lian sira ne'e ba aborda ho instituisaun relevante atu oinsá mak fo solusaun, no mós PDHJ iha manuál boa governasaun asegura la iha asedu sexsuál iha servisu fatin.
"Entaun instituisaun relevante tenke asume sira nia servisu,nudar makina advokasia ami nafatin servisu hamutuk ho movimentu sira inklui KSTL,oinsá mak ita bele hatutan lian husi Vitíma sira importante liu-liu ba situasaun ida mak Vitíma sira la bele nonok, labele tauk, la bele hanoin mesa, la bele hanoin katak se ha'u keixa karik ha'u sei lakon servisu, labele hanoin ida-ne'e,"nia informa.
Nia hatutan tanba iha movimentu no Organizasaun barak iha li'ur ne'ebé atu fo apoiu ba sira hanesan ne'e
"Tanba ema barak iha li'ur ne'ebá, iha movimentu barak no Organizasaun barak, mak sempre prontu atu fo apoiu ba situasaun sira hanesan ne'e,"nia hatutan
Molok ne'e, Parlamentu Nasionál (PN) husu Konfederasaun Sindikatu Timor-Leste (KSTL) atu identifika didi'ak kompaña 50 ne'ebé ninian empregador sira tenta atu halo violensia asediu seksuál hasoru traballadora feto sira iha servisu fatin.
Grupu Muller Parlamentár Timor Leste (GMP-TL) sempre defende feto maluk sira, ne’e duni kuandu iha buat ruma ne'ebé akontese ba fto maluk siratenke fó hatene ka keixa iha orgaun justisa ninian.
"Ita prezia KSTL atu identifika didi'ak kona-ba kompaña 50 ne'e, naran saída no tanba sá empregador tenke halo hanesan ne'e, ida ne'e maka ita husu tenke identifika duni" informa Deputada, Aliança Conceição de Araújo bá Jornalista INDEPENDENTE iha resintu PN, (22/11).
Nia hatutan, tanba beibeik ona kompaña nia empregador sira ne'e uza de'it traballador feto sira hodi halo tuir sira (empregador) nia hakarak.
Tanba ne'e nia enkoraza bá traballadór feto sira, katak bainhira hasoru violensia ruma husi empregador iha servisu fatin, la bele ta'uk hodi ko'alia sai, tanba Estudu Timor-Leste iha lei, nune'e Violasaun hothotu la'o tuir lei.
"Ha'u enkoraza an ha'u nia feto maluk sira, karik sei buat ruma akontese bá sira iha fatin servisu, labele nonok, tan de'it tauk la hetan ona servisu maka sira tenke nonok, ne'e la bele,sira tenke ko'alia sai para buka tuir ema ne'ebé nia hahalok iha kompaña nia laran ne'e, responsabiliza ninia aktu," nia enkoraza.
Deputada Aliança garantia katak feto ne'e servisu iha kompaña nia laran, maibé empregador sira maka utiliza hodi halo tuir sira nia hakarak.
Nia dehan, se kompaña sira ne'e, KSTL dehan maioria husi Xineza, tenke hato'o mós bá Ministériu Negósiu no Kooperasaun Estranjeiru hodi haree Xineza sira ne'e sei ida duni Violasaun asediu seksuál tenke haruka fila.
Nune'e mós, nia husu KSTL atu aprezenta mós dadus bá Parlamentu Nasionál, atu nune'e Deputadu no Deputada sira levanta iha plenaria, no halo mós fiskallizasaun hodi haforsa mós Indentifikasaun, atu atu defende traballador feto sira.
Membru komisaun F trata asuntu saúde seguransa sosiál igualdade Jéneru Deputada Bankada FRETILIN Helana Martins Belo hateten, asediu seksuál ne'e tenke luta atu kombate, sira feto maluk tenke fó liman bá maluk atu kombate hasoru ida ne'e, ida-ne'e labele ne'e krime.
"Tanba ne'e maka sei kompaña 50 ne'ebé maka KSTL indentifika katak mosu asediu seksuál, signifika katak númeru ne'e boot, ita husu KSTL mós atu identifika didi'ak dadus hodi fornese mai ami iha Parlamentu Nasionál atu nune'e mós ami bele tun ba retornu hodi halo fiskallizasaun direita bá iha kompaña sira ne'e," Deputada Helena Martins Belo hateten.
Nia hatutan hanesan reprezentante povu no feto iha Parlamentu Nasionál, nia hanoin maluk feto sira ne'ebé, hasoru violensia asediu seksuál iha fatin servisu la bele ta'uk hodi hakbesik aan husi parte justisa nian hanesan bá iha KAK, PDHJ, atu hato'o Keixa ne'ebé maka sira (feto) iha, labele tauk tan de'it atu lakon servisu.
"Hanesan reprezentante Povu iha uma fulun Parlamentu Nasionál,liu-liu ha'u nia feto maluk, ha'u hanesan Membru komisaun F ne'ebé trata asuntu igualdade Jéneru, atu fó nafatin informasaun bá ita nia maluk feto sira atu barani nafatin hodi hatete buat ne'ebé mosu bá sira," nia enkoraza.
Reprezentante Povu ne'e, kontinua enkoraza traballadora feto sira, labele tauk lakon servisu, sei sente duni katak empregador sira tenta atu halo hanesan ne'e, dalan di'ak maka tenke keixa, tanba ne'e kirme.
"Ha'u nia feto maluk sira lalikan tauk, labele hanoin katak tan de'it atu lakon servisu imi nonok de'it, ne'e labele, tanba ne'e kirme, ita iha direitu fundamentais ne'ebé ita nia Konstitusaun RDTL fó" nia dehan.
Liga ho kompaña 50 ne'ebé halo violensia asediu seksuál hasoru traballador feto sira, Deputuada ne'e dehan, atu kompaña husi estranjeiru husi rai laran, Amérika ka Xineza, maibé kuandu viola lei liu-liu asediu seksuál, tenke bá hatan.
Molok ne'e, Konfederasaun Sindikatu Timor-Leste KSTL Indentifika mosu kazu hasoru feto sira ne'ebé servisu iha kompaña 50 ne'ebé eziste iha kapitál Dili.
Prezidente KSTL Almeiro Vila-Nova hateten, problema sériu ne'ebé akontese bá fwtit sira iha servisu fatin mak asediu seksuál.
Tuir dadus ne'ebé KSTL iha, empregador husi kompaña 50 halo asediu seksuál ba traballdór feto sira iha servisu fatin.
"Ita indentifika Kompaña 50 iha Dili, ami bá foti dadus iha ne'ebá, ami nota katak iha problema asediu ne'ebé traballador feto sira efrenta iha ne'ebá, dehan Prezidente KSTL bá Jornalista INDEPENDENTE hafoin remata Workshop kona-bá konvensaun ratifikasaun OIT númeru 190, iha Salaun Luz Clarita, (21/11).
