PR Horta hatete, nia promulga lalais OJE 2025 ne’e tanba iha fulan hirak nia laran nia simu tiha ona kopia no estuda kleur ona.
"Ohin (horseik) dader ha'u simu Prezidente Parlamentu Nasionál entrega ba ha'u Orsamentu Jerál Estadu 2025, ha'u promulga tiha ona, tanba fulan hirak nia laran ha'u simu tiha kopia ida, no ha'u estuda kleur tiha ona, ne'ebé laiha problema konstitusionál.”
“FRETILIN ho PLP vota kontra la hatene tanba sa, maibé ha'u fiar la'ós kestaun konstitusionál. Purtantu fulan ida nia laran maizumenus ha'u simu tiha ona, estuda kleur tiha ona, ne'eduni ohin kedas ha'u promulga," deklara PR Horta ba jornalista sira bainhira akompaña Deputada Repúblika Indonézia, Julie Laiskodat, vizita konventu Madre Alma, Bebonuk, Segunda (25/11).
Tuir Horta, buat ne’ebé nia la konkorda iha governu ne’e la’os orsamentu maibé seidauk iha reforma maka'as ba instituisaun públika ne'ebé barak demais iha Timor-Leste.
"Ha'u espera 2025 governu estuda ne'e didi'ak tanba maun Xanana mós uluk hatete instituisaun públika barak demais, no barak la servisu, servisu saida? Eletrisidade mate moris, bee mate moris, farmasia medikamentu sempre problema, sira servisu saida? Hanesan SERVE servisu saida? Maibé prontu ne'e lá'os kestaun ida konstitusionál, ne'e kestaun governasaun, Primeiru Ministru mak tenke haree ne'e ba oin," dehan PR Horta.
Enkuantu, Prezidente Parlamentu Nasionál, Maria Fernanda Lay hafoin hasoru PR Horta hatete, nia lori OJE 2025 hodi entrega ba PR Horta.
"Ha'u hanoin Primeiru Ministru mak halo orsamentu, Primeiru Ministru mai uluk ne'ebé ha'u lalika ko'alia barak, ha'u fó hatene prosesu la'o oinsá, laiha viola demokrásia, nein rejimentu, embora husi opozisaun trata nune'e mais la loos,” dehan Prezidente PN ne’e.
Molok ne’e, Direitór Ezekutivu FONGTIL, Valentim da Costa Pinto 'Koko' husu ba PR Horta atu estuda didiak OJE 2025 tanba orsamentu ne’e ladun reflete ba saida mak Xefe Estadu sempre dehan, liu-liu kona-ba elimisaun ba manutrisaun, ekonomia, edukasaun no saude.
Tuir nia, OJE 2025 kontinua la hatudu seriedade governu hodi bele halo meloramentu ba setór ne’ebé konsidera importante.
Alokasaun orsamentu, nia hatutan, barak liu ba saláriu no vensimentu kompara ba kapitál dezenvolvimentu.
Orsamentu sira ne’e, aloka ba setor ne’ebé ladun produtivu, tanba atu finansia de’it ba atividade viajen, serimónia, no enkontru.
Orsamentu ba setór produtivu sira, nia dehan, kuaze la ultrapasa 20%. Ida ne’e hatudu katak governu atu kontinua halo saida mak daudauk ne’e iha.
Governu dasia dehan tinan 2025 nu’udar tinan ba implementasaun, maibé ida ne’e la reflete iha alokasaun orsamentu.
“Osan ne’ebé aloka ba saláriu vensimentu boot liu osan ne’ebé aloka ba dezenvolvimentu, entaun atu halo mudansa ne’e susar loos,” dehan Koko ba jornalista sira, iha nia kna'ar fatin Kaikoli, Kinta (21/11).
Nia afirma, orsamentu ida ne’e iha defisiénsia lubuk ida ne’ebé la hatudu espiritu no la hatudu votante ida hakarak halo mudansa ba situasaun sira ne’ebé povu hasoru.
"Orsamentu aprova tiha ona, nia montante iha tiha ona, ami husu mak tenke kontinua jere ho di’ak, maibé ita sei la lori mudansa boot, tanba ita iha tendénsia atu aloka ba saláriu ho vensimentu mak bo'ot liu.”
“Orsamentu iha laran ne’e kuaze finanseira de’it ba atividade serimoniál, viajen, halo alojamentu ba sasan sira ne’ebé instituisaun presiza no parlamentu sosa karreta, maibé imi haree polísia sira iha fronteira kondisaun aat loos.”
“Fronteira hanesan ita-nia odamatan presiza asegura nia kualidade, fasilidade no ekipamentu ne’ebé iha atu asegura planu dezenvolvimentu sira, no kondisaun natoon bele halo kestaun fronteira sira, liu-liu kombate kona-ba aktu legál sira ne’ebé kontinua akontese iha fronteira," nia fó ezemplu.
