Rejultadu Provizoriu: AMP-FRETILIN Aumenta Votu, PD Tuun Featured

By Maiu 14, 2018 2513
Rezultadu provizóriu apuramentu munisipál Rezultadu provizóriu apuramentu munisipál

DILI: Rezultadu provizóriu apuramentu munisipál fó sai ona, husi partidu polítiku ualu (8) ne’ebé konkorre iha eleisaun antesipada ne’e iha ona serteza partidu haat maka konsege ultrapasa barreira hodi tama ba Parlamentu Nasionál.

Partidu hirak ne’ebé konsege hakat ba Parlamentu Nasionál maka partidu koligasaun Aliansa Maioria ba Progresu (AMP) hetan vitória no tuir partidu FRETILIN, Partidu Demokrátiku (PD) no koligasaun Frente Dezenvolvimentu Demokrátiku (FDD).

Eleisaun antesipada tinan ne’e kompara ho eleisaun iha 2017 iha diferensa makaas. Partidu polítiku sira balun hetan aumentu votu barak, nune’e iha mós partidu balun ne’ebé hetan ‘derrota’ tanba la konsege atinji votu ne’ebé hetan iha tinan kotuk.

Rezultadu provizória ne’ebé fó sai husi Sekretariadu Administrasaun Tékniku Eleitorál (STAE) to’o iha tuku 21.50 koligasaun AMP hetan votu 309.015, tuir partidu FRETILIN ho votu 212.974, PD ho votu 50.034, FDD ho votu 34.279.

Haree husi votu ne’ebé partidu hirak ne’e hetan, koligasaun AMP maka ‘hana'ok’ votu barak liu kompara ho partidu sira seluk ho totál votu 45.031, tuir partidu FRETILIN ho votu 44.494.

Koligasaun AMP ne’ebé kompostu husi partidu CNRT, PLP no KHUNTO, iha tinan 2017 CNRT hetan votu 167.345, PLP hetan votu 60.098 no KHUNTO hetan votu 36.547, nune’e soma hamutuk hetan votu 263.990, maibé iha eleisaun antesipada ne’e sa'e ba votu 309.015.

Partidu FRETILIN rasik iha eleisaun 2017 nian hetan votu 168.480, maibé iha eleisaun antesipada ne’e votu aumenta ba votu 212.974.

Entretantu, Partidu Demokrátiku hetan ‘derrota’ bainhira hateke fali ba rezultadu eleisaun 2017 nian. Votasaun liu ba hetan votu 55.608, maibé iha eleisaun antesipada hetan de’it 50.034 ka lakon votu 5.574.

Nune’e, partidu koligasaun FDD konsege ultrapasa barreira hodi hakat ba parlamentu nasionál ho totál votu 34.279.

Nune’e, atribuisaun kadeira Parlamentu Nasionál provizoriamente, koligasaun AMP hetan kadeira 34, partidu FRETILIN kadeira 23, PD hetan kadeira 5 no FDD hetan kadeira 3.

Hafoin kontajen votu iha munisípiu, iha loron hirak tuir mai Komisaun Nasionál Eleisaun (CNE) sei halo re-kontajen hodi apuramentu nasionál, nune’e bele konfirma hikas númeru votu hirak ne’e. 

Rate this item
(0 votes)

Independente Digital TV