Sekretariu Estadu Floresta, Fernandino Vieira da Costa hatete, atetude umanu ne’ebé depedensia deit ba ai-sunu fó ameasa ba dezenvolvimentu nasaun nian.

Tan ne'e, liu husi liu sensibilizasaun ne’e, atu fó hanoin ba komunidade sira atu iha responsabilidade hodi konserva no proteje rekursu floresta ne’ebé iha.

“Durante periodu naruk ne’e, ita iha ameasa ne’ebé boot tebes husi atetude umanu ne’ebé mak hare katak komunidade balun nia moris sei depedente ba ai-sunu, tan ne’e konsulta popular ida ne’e hala’o atu fó hanoin nafatin komunidade sira atu nune’e sira mós iha responsabilidade proteje no konserva rekursu floresta nian,” dehan Fernandinho iha Sede Suku Hera, Kinta (10/07).

Governante ne’e afirma, bainhira udan monu rai, inundasaun akontese iha fatin-fatin, tanba kauza husi komunidade sira ne’ebé moris la familiár ho natureza.

Iha fatin hanesan, Diretór Nasional Konservasaun Floresta Dezenvolvimentu Eko-Turizmu, Pedro Pinto, husu ba autoridade lokal ho komunidade sira iha suku hera, atu labele  fa’an  área protezida sira.

Tanba, área ne'ebé tama ona ba mapa área protejiza, tuir lei ne’e bandu.

“Area ne’ebé ak tama ona mapa area protejida lei proividu kompra venda iha ne’ebá, lei proibido ita tesi ai iha ne’ebá, no oho animal sira iha ne’’bé, bainhira ema halo ida ne’e mak lei sei kondena,” dehan Pedro Pinto.

Entretantu, Xefe Suku Hera, Antoninho Marques da Silva husu ba governu atu nafatin  sensibiliza lei ba komunidade sira, tanba durante ne’e komunidade sira la iha konsiensia hodi kontinua tesi ai.

“Sensiabilizasaun ne’e kapas, maibé ami nafatin husu atu kontinua senbiliza lei ba komunidade sira tanba oin ne’e tempo badak liu tan ne’ ita presiza esplika ke’an liu konaba lei sira ne’eb’e bandu atu tesi ai,” dehan Xefe Suku.

Enkuantu, remata sensibilizasaun iha Suku Hera, Sekretária Estadu Floresta kontinua halo sensibilizasaun ho asuntu ne’ebé hanesan ba komunidade sira iha aldeia 12 Outubro Suku Komoro Munisipiu Dili.