Komunidade Goris Silveira ne’ebé hela iha área protejida Tasi-Tolu hatete,  bainhira governu la kria programa ida diak no laiha kampu traballo mak komunidade sira kontinua tesi ai.

Nia hatutan, governu bandu deit, sei la to’o, maibé presiza servisu hamutuk ho komunidade sira atu sai liman ain ba guarda floresta nian atu nune'e bele kontrola ema ne'ebé tesi ai.

“Ami nia peokupasaun bandu de’it ne’e la to’o, maibé ita presiza tau krontrolo liu husi servisu hamutuk ho komunidade sira ne’ebé iha área refere no rekruta joven sira atu sai hanesan liman ain ba guarda florestal sira atu bele kontrola,” dehan Goris sileira iha Sede Aldeia 12 Outobru Tasi-Tolu, Kinta (10/07). 

Nia haktuir, kona-bá pekuaria, iha Lagoa Tasi-Tolu Animal liliu manu sira la iha hotu tanba la tau ema ne’ebé espesifiku atu kontrolu.

Iha sorin seluk Xefe Suku Hera, Antoninho Marques da silva hatete, atu fahe de'it informasaun ba komunidade konaba labele tesi ai no estragus balada fuik ne'e sei la to'o maibé presiza reforsa husi guarda floresta.

“Ita husu ba guarda floresta sira nafatin halo patrullamentu atu hare komunidade sira ne’ebé kontinua kasa animal fuik sira, hanesan ohin ha’u mensiona katak mai iha diresaun Fatu-ahi dadersan komunidade sira sempre fa’an animal fuik, entaun intervensaun husi guarda floresta mak importante,” dehan Xefe Suku.

Hatan ba preokupasaun ne’e, Sekretariu Estadu Floresta Fernandinho Vieira da Costa hatete, dadaun ne’e iha guarda floresta ne’ebe estaka iha munisipiu Dili nafatin halo patrollamentu no prevensaun ba komunidade sira nia atetude konaba ba tesi ai, sunu no kasa animal fuik.

“Guarda Floresta labele tur deit iha edifisiu no la’o deit iha estrada maibé tenki la’o tama to’o ai-laran, bele mós toba iha ai-laran hodi halo prevensaun,” dehan SEF.

Enkuantu, guarda floresta ne’ebé destaka iha Munisipiu Dili hamutuk na’in 40, no husi dadus ne’e aloka ona ba postu no suku sira maibé seidauk kobre hotu.