Sekretáriu Estadu Ensinu Sekundáriu Jerál no Tékniku Vokasionál, Domingos Lemos Lopes informa, nia parte hamutuk ho diretór no asesor sira haree fila fali pontu balun kona-ba modelu no kór uniforme.

"Ohin ami ho asesór no Diretór Jerál sira haree filafali pontu balun ne'ebé ami deside no halo ona revizaun oituan ba nia modelu ho kór sira. Espera katak sei aselera prosesu ne'e, nune'e bele implementa," dehan Domingos, iha edifísiu ME, Vila Verde, Kuarta (10/07).

Domingos dehan, ME sei promove tais hanesan identidade Timor-Leste ba uniforme eskolár nune'e estudante sira bele utiliza.

"Parte jurídiku Ministériu Edukasaun haree hela no ami husu atu aselera lalais," nia akresenta.

Tuir sirkulár ME nian ne'ebé fó sai iha tinan kotuk, katak nia mekanizmu no regra sira-ne'e sei sai husi diploma ida, iha artigu 14, bazeia ba dekretu-lei númeru 32, 33, 34, ho rejime jurídiku sistema nasionál edukativu nian.

"Ida-ne'e tenke ho nia diploma ministeriál ida, liu-liu ba mekanizmu uzu, modelu, kór no kustu, atu nune'e labele prejudika tan inan-aman sira," governante ne'e reforsa.

Antes ne'e, ME simu fali esbosu diploma ministeriál kona-ba uniforme eskolár iha fulan-juñu, nune'e iha fulan-jullu ne'e hahú hadi'a.

Hafoin prosesu ne'e, sei submete ba Prezidénsia Konsellu Ministru atu ezekutivu sira bele diskute no foti desizaun hafoin bele implementa iha tinan ne'e.

Diretór Eskola Ensinu Sekundáriu Tékniku Vokasional Industria no Teknolojia (ESTVIT) 28 Novembru Becora, Tomas Pinto, husu ba Ministériu Edukasaun (ME) atu aselera lalais uniforme eskolár. Tanba to'o agora estudante ba anu letivu foun ne'e la iha uniformidade.

"Uniforme eskolár ne'e to'o agora ita seidauk produz tanba desizaun husi Ministériu Edukasaun katak labele produz ka haruka estudante sira suku lai farda foun hodi hein desizaun foun husi Governu ba modelu farda ida de'it ba eskola sira iha teritoriu tomak. Tanba ne'e mak ami la haruka estudante foun sira suku farda ne'e. Kleur loos ona entaun ita husu ba Ministériu Edukasaun atu aselera lalais ona tanba estudante foun sira to'o agora la iha uniforme," dehan diretór.

Nia informa, eskola sira ezizi atu aselera uniforme eskolár tanba atu tama ona ba periodu daruak maibé estudante foun sira mai nafatin ho uniforme tuan ka husi eskola anteriór sira nia entaun ketak loos ho estudante tuan sira.

"Ita hein desizaun husi ME mak foin bele, maibé to'o agora ita hein no tama ona ba periodu daruak ona mós ita nia oan sira nafatin mai ho farda husi eskola anteriór nia, uza faru mutin, entaun sira ketak loos ho estudante tuan sira ne'ebé iha nanis ona farda molok ME hasai sirkular," nia informa.

Estudante ESTVIT 28 Novembru, Augusto Perreira, hatete, Ministériu Edukasaun presiza haree ba asuntu uniforme eskolár nia ne'e , tanba dezde estudante foun sira tama ne'e la iha farda to'o agora. Entaun sira ketak loos ho estudante tuan sira.

"Ami tama ba areadór eskola ne'e ho farda modelu oioin de'it tanba ami ho faru mutin no ami nia bin maun sira tuan ne'e uza farda ida antes iha ne'e, entaun ita keta-ketak loos iha areadór eskola nia. Ita husu Ministériu Edukasaun atu haree ba asuntu ne'e tanba dalaruma mós estudante foun husi eskola seluk tau hotu faru mutin ne'ebé dalaruma sira seluk mak halo problema mós ema deskonfia dehan ami hotu tanba ami ho estudante husi eskola seluk ne'e uza faru mutin hanesan de'it," dehan estudante.

Totál estudante husi Eskola Sekundária Tékniku Vokasional Industria no Teknolojia (ESTVIT) 28 Novembru hamutuk 518 ho profesór 37.