Diretór Jeral SEI Armando da Costa hatete, ekipa rede referál ho Sekretaria Estadu Igualdade, hamutuk atu haree ba asaun no solusaun sira ne’ebé membru sira hasoru bainhira halo atendementu ba iha komunidade sira.
“Membru rede referral relata problema sira ne’ebé hasoru no ekipa ida rede refeal nivel advokasia ida ne’e hamutuk hodi hare asaun no solusaun relevante ba problema sir aba kazu sira ne’ebé membru sira hasoru bainhira halo atendementu ba iha ita nia komunidade ka sosiedade,” dehan Diretór Jeral iha Edifisiu SEI Kaikoli, Segunda (08/07).
Diretór Jeral afirma, iha enkontru ne’e, rede referál sira mós relata kona-ba númeru kazu violénsia doméstika no violénsia hasoru labarik kontinua rejista aas iha komunidade nia leet.
Ba númeru kazu ne’ebé aas, SEI ho membru rede referál sira kontinua desimina informasaun hodi hasa’e konsiénsia no mudansa atetude sidadaun sira-nian atu bele redús ka hapara violénsia sira ne’e.
Diretora Ezekutiva FoKuPers Domingas Afonso Amaral hatete, SEI halo nia papel ne’ebé di’ak tebes, tanba bele envolve organizasaun sosiedade sivil sira ne’ebé halo servisu ba asistensia feto no labarik feto sira ne’ebé sai vitima ba violensia bazeia ba jeneru.
Nia afirma, tan ne’e, enkontru ne’e importante tebes, SEI sai hanesan líder Rede Referál ba advokasia no sai hanesan makina estadu nian atu asegura Igualidade jéneru
"Ha'u hanoin ida ne'e importante tebes SEI ne'ebé mak hola papél importante atu lídera Rede Referál ba advokasia nian entaun SEI hanesan makinaria estadu ne'ebe atu asegura Igualidade jéneru,"katak Diretóra
Entretantu, rede referal ne’ebé partisipa iha enkontru ne’e mai husi linã ministerial sira, sosiedade sivil no parseria nasionál no mos internasionál.
Enkuantu, tuir dadus, iha tinan 2023, Fokupers rejista kazu violensia bazeia ba jeneru hamutuk atus rua, tolu nulu resin ida (231).