Difisiente matan Jacinto Gusmão hatete, kandidatu ne’ebé sai eleitu tenke ukun povu sira ho dignu no kria paz no estabilidade iha rai doben ida ne’e.
“Ha’u fó hanoin ba kandidatu ne’ebé sei manan ukun povu di’ak no kria paz no estabilidade,”dehan Jacinto ba diariu INDEPENDENTE bainhira partisipa votasaun iha Ensinu Primaria Filial 12 Tuana Laran segunda (20/03).
Nia dehan, ho kondisaun ne’ebé ho difisiente iha vontade nafatin hakarak apoiu ninia votu ba kandidatura na’in walu ne’e.
Maibé, kuandu kandidatura ne’ebé eleitu tenke tau matan povu no difisiente ho balansu.
“Ha’u hanesan difisiente, hanesan timoroan hakarak atu fó sira nia apoiu netik ha’u nia votu no ne’ebé sei eleitu tenke haree didiak povu no liu-liu ba ami difisiente sira,”dehan nia.
Entrtantu iha parte seluk Prezidente da Republika Taur Matan Ruak akompaña ho nia espoza (Primeira Dama) Isabel Fereira vota iha Suku Metiaut, Eis Prezidente da Republika Kay Rala Xanana Gusmão vota iha Dare, Premiadu Nobel da Paz Jose Manuel Ramos Horta iha Bidau, Primeiru Ministru (PM) Rui iha Bidau.
Nune’e mós kandidatu númeru sorteiu 1 Antonio Maher Lopes alias ‘Fatuk Mutin’ iha Dare, Kandidatu númeru sorteiu 2 Francisco Guterres alias ‘Lu-Olo’ akompaña ho nia espoza vota iha Farol, kandidatu númeru sorteiu 3 Amorin Viera vota iha Komoro-Marinir, kandidatu José Neves Samala-Rua iha Bairopite, kandidatu Jose Luis Guterres vota iha sentru votasaun iha Eskola Primaria, suku Fatuhada, kandidatu Angela Freitas iha Eskola Primaria Xina, kandidatu Luis Tilman iha Gleno, no kandidatu sorteiu 8 Antonio do Concenção alias ‘Kalohan’ ho ninia espoza vota iha Tuana Laran Suku Villa Verde.
