Xefe Misaun Observasaun Uniaun Europeia Timor-Leste 2017, Izaskun Bilbao Barandica fó kongratulasaun ba povu Timor-Leste tanba sentru votasaun loke tuir tempu ne’ebé deside no kumpri duni prosedimentu sira.
Nia dehan, prosesu abertura ne’e transparante tebe-tebes, tanba observador nomós fiskal sira ne’ebé prezente atu hala’o sira nia servisu no knaar sein interferensia.
“Maibé iha parte balun, ami mós observa katak, forma liña naruk hein kleur uitoan atu ba vota,”esplika Izaskun, ba jornalista sira, iha loron Segunda-Feira (20/03), iha sentru votasaun Vila-Verde Dili.
Entertantu, Izaskun reforsa, segredu vota hanesan garantidu, depois laiha obstaklu ruma ba ema sira atu ezerse direitu ba vota.
“Avaliasaun jerál ba eleisaun refere sente di’ak tebe-tebes, tanba iha loron eleisaun ne’e rasik porsedimentu elitoral hot-hotu ne’e kompri bazeia ba buat ne’ebé ami halo iha sentru votasaun sira,”realsa Izaskun.
Misaun Observasaun Uniaun Europeia Timor-Leste 2017 iha ekipa sanolu resin lima (15) ne’ebé halo observasaun, observadór na’in tolu nolu resin lima (35). Ekipa ne’e marka prezensa iha reziaun autonoma sanolu husi munisípiu sanolu resin tolu (13) iha Timor-Leste.
