"Ita lakon dadus dokumentu importante barak, ho krize ne'ebé ita hasoru, triste boot ba ita, tanba ne'e presiza sai erói foun ho inisiativa, inovativa hodi konserva dokumentu ne'ebé iha, agora la folin, tanba ita akompaña istória, prosesu imporante hotu. 50 anos, 100 anos mai, sei gasta osan barak hodi sosa ita-nia arkivu ne'ebé ema seluk halo," deklara Adjunta Kaza Sivil, Henriqueta Maria da Silva, iha komunikadu ne’ebé Online INDEPENDENTE sita, domingo (12/03).
Tuir komunikadu hatete, Adjunta Kaza Sivíl aprezenta, jestaun arkivu iha Japaun, merese sai referénsia ba Timor-Leste, atu halo konservasaun ba dokumentu.
"Aban bairua nia folin karun liu fali, iha Japaun dijitaliza buat sira hotu, joven ho kreatividade, halo kliping, hodi halo hanesan pameran, iha balun sira halo sai filme husi buat pedasuk pedasuk, ne'e sai historia únika husi dékada hira liu ba," tenik Henriqueta Maria.
"Ne'e Palásiu Nobre, formasaun nobre, hein implementasaun ba buat ne'ebé aprende. Husi ita nia memória, istória Timor nain, ita koñese aan mak ita dezenvolve-an, formasaun ne'e, hanesan fatór importante, atu dezenvolve ita-nia rain, liu-hosi prezerva kona-ba história," Tenik.
Reprezentante Diretór Jerál Arkivu Nasional Timor-Leste, Fernando Sousa, mós defende importánsia konservasaun dokumentu, hodi tulun nasaun halo dezenvolvimentu.
"Arkivu nasionál Timor-Leste, importante ita-bo'ot sira bele entende di'ak importánsia arkivu ba ita Timor-oan. Treinamenru hanesan jestu konsiderasaun, katak arkivu ne'e importante," tenik Fernando Sousa.
Entretantu, formasaun durante semana ida, partisipa husi funsionáriu Prezidénsia Repúblika na’in 37, hodi aumenta sira nia kompeténsia iha jestaun dokumentu.
Programa ne’e realiza, tanba servisu hamutuk entre Prezidénsia Repúblika ho Arkivu Nasionál Timor-Leste. Maibé, formadór sira ba formasaun ne’e hamutuk na’in 8, na’in 7 husi Arkivu Nasional Timor-Leste no ida husi Palásiu Prezidensiá.
