Nia dehan, projetu ida ne’e hanesan pasu importante ida husi komprimisiu oitavu Governu Konstituisional nian hodi proteze meiu ambiente no bá saúde públika.
“Projetu ida ne’e estratejiku tebes bá dezenvilvimentu iha Timor-Leste, tanba sei substitui lokais de lixu bá céu abertu, ne’ebé prejudika tebes ema nia saúde no estratega meiu ambiente, ho ateru kontroladu,”dehan nia iha Tibar, sesta ne’e (10/03).
Ministru esplika, iha projeto ne’e sei hamate ahi ne’ebé durante ne’e han lixo iha Tibar, sei ke’e sai hotu lixo existente sira, tau lona permeavel hodi satan liziviados sira tama ba rai laran hodi ense fali ho lixo foun, no kanaliza liziviados sira ba fatin apropriado hodi nune’e halo lixeira iha Tibar ne’e sai tia aterro kontrolado.
Governante mós akresenta, aterro kontrolado Tibar ne’e sei lori benefisiu barak tebes ba populasaun lokal sira, sei hamosu empregu, impulsiona ekonomia lokal, no mellora kondisaun moris ema barak nian ne’ebé hela besik lokal ne’e.
Tuir Ministru, projeto ne’e sei kontribui atu hadi’a liu tán saúde públika, nune’e bele reduz expozisaun populasaun nian ba rezidous ne’ebé perigo boot, no prevene dezeminasaun husi moras ne’ebé iha, tanba falta husi sanemento bázico.
Projecto ne nuudar ezemplo ida ne’ebé bele konsilia krensimentu ekonomia ho prezervasaun ida ba meiu ambiente no ba promosaun saúde públika.
Projeto rekualifikasaun ida ne’e, sei konstrui husi Kompañia China Harbour Engeneering Company Limited, Joint Venture ho PAX Cleaning Service no Pioner, sei hahú operasaun ba konstrusaun imediatamento, inklui jestaun aterro iha fatin refere durante tinan 7 tuir mai.
Iha fatin hanesan, Sekretariu Estadu Meiu Ambiente, Deometru Amaral, hatete, lansamentu primeira pedra ida ne’e ba dezenvolvimentu ba sanitaria lenvil ne'ebé sei hadi'a sentru tratamentu lixu Tibar nian.
“Ita haree lixu mai soe iha Tibar laiha tratamentu, purtantu ho lansamentu ne’e, empreze china Harbour ne’ebé sai selesianado ba jestor sei harii mekanismu ida iha Tibar no empreza rua ne’ebé sei halo rekoladu lixu husi Dili mai soe iha lixeira Tibar, nune’e, ita bele fó solusaun ba problema lixu hodi hadi’a ita nia ambiente no hadi’a mós saúde públika,”dehan Deometro.
Tuir nia, atu garantia lixu iha sidade Dili moos, ema hotu tenki iha konsiensia katak lixu ne'e problema uma kain no problema idak-idak nian la’ós problema Governu, Governu tau mekanismu fó solusaun maibé ema hotu tenki iha responsaibilidade ba melloramentu lixu.
Entretantu, Prezidenti Autoriedade Munisipiu Dili Guilhermina Filomena Soares Freitas Ribeiro hatete, objetivu Residu Solida Urbana nian mak halo melloramentu ba jestaun lixu ne'ebé adekuadu, organizadu liu husi guia sanitaria tratamentu ho ekipamentu modernu.
