Ministra Saúde Odete Maria Freitas Belo iha nia diskursu hato'o agradese ba Governu Japaun ne'ebé kontinua haforsa relasaun koperasaun entre Governu Japaun ho Timor-Leste liu husi fortalesimentu sistema nasionál saúde nian.
"Serimonia inaugurasaun fasilidade ultrasonografia iha HNGV, ohin loron nuudar ezemplu simbóliku ida ne'ebé reflete komprimisiu nasaun amigu na'in rua hodi hadi'a kapasidade Óspital Nasional atu responde di'ak liu tan bá nesesidade saúde espesializada populasaun nian,”dehan nia iha HNGV, Bidau, sesta ne’e (10/03).
Ministra haktuir, hanesan ema hotu hatene katak HNGV asume responsabilidade boot nudar óspital referensia iha Timor-Leste hodi fó asistensia médika ne'ebé ho kualidade as kompara ho fasilidade saúde sira seluk.
"Servisu diagnostíku saúde hanesan ultrasonografia importante tebes liliu ba inan isin-rua sira, no permeti profisional saúde sira atu monotoriza kresimentu no dezenvolvimentu labarik nian no fó imajem ida ho kapasidade atu fó informasaun detallada husi orgaun saúde reprodutiva sira hanesan orgaun figadu, rins bexiga," tenik nia.
Tanba ne'e, Ministra Saúde nafatin hato'o agradese wain ba liderans HNGV ne'ebé kopera ho embaixada atu hadi'a infrastrutura fiziku no matérial iha departamentu radiolagia hodi responde di'ak liután bá nesesidade pasiente sira relasiona ho servisu ultrasonografia.
Iha fatin hanesan, Embaixadór Japaun iha Timor-Leste Tetsuya Kimura hatete, importante ba Governu Japaun katak ema hotu iha mundu tomak bele hala'o sira-nia moris ne'ebé seguru no protejidu.
Atu asesu ba servisu saúde nian nu'udar elementu ida ne'ebé importante tebes hodi alkansa objetivu ida ne'e.
Tan ne'e mak Governu Japaun finansia ona projetu oioin atu promove servisu kuidadu saúde nian iha Timor- Leste.
"Ho kontestu ida nee, ita bele dehan katak Óspital Nasional hala'o papél importante hodi garante atendimentu saúde ne'ebé di'ak ba ema hotu iha Timor-Leste," tenik nia.
Embaixadór ne'e esplika, liu husi projetu ne’e, Governu Japaun suporta halo espansaun sala ultrasonografia husi departamentu radiolojia.
"Hau haksolok tebes tanba ita-boot sira finaliza ona projetu ne'e ho susesu hodi kria ambiente médiku ne'ebé di'ak liu no konfortável liu bá pasiente no pesoál servisu sira, no mós ekipamentu balun hanesan ekipamentu diagnóstiku ultrasoniku ne'ebé fornese husi Japaun iha tinan 2018 mak utiliza iha fatin refere," dehan nia.
Entretantu, Embaixadór ne’e dehan, Governu Japaun mós suporta Óspital Nasional ba halo espansaun departamentu emerjénsia no renovasaun área hein fatin nian iha tinan 2017.
Enkuantu, fasilidade ultrasonografia ne'ebé apoiu husi Governu Japaun hamutuk unidade haat (4) ho total orsamentu hamutuk rihun $70.
