Enkuantu, formasaun ne’e realiza tanba hetan servisu hamutuk entre MSSI, Partnership for Human Development (PHD) no Inclusion Advisory Group.
Durasaun ba formasaun refere loron ida (1) ne’ebé fasilita husi CBM (Global Disability Inclusion).
Xefe Gabinete Estratéjia Plañeamentu no Dezenvolvimentu Institusionál-MSSI, Gil da Cruz hateten, formasaun ne'e involve husi embaixadores ba EhD no liñas ministeriais sira ne'ebé iha Governu, hodi prepara atu halo relatoriu.
"Ohin loron ita hetan oportunidade husi formador husi Australia hodi reforma ita nia maluk ho difisiénsia no emprezaria sira hotu ba konvensaun plano implementasaun ba periodo 2021 to 2030 nian," dehan nia iha Salaun Suai Room, Timor-Plaza, kinta (09/03).
Xefi Gabineti esplika, formasaun ne’e liga ho ratifikasaun ba konvensaun direitu EhD, tanba bainhira Estadu TL ratifika ona konvensaun ne’e, MSSI iha dever atu implementa.
“Ho nune’e formasaun ida ne’e ho objetivu oinsá bele halo preparasaun atu implementa konvensaun refere no halo relatóriu kada fulan neen (6) ba iha United Nations Convention On The Rights Of Persons With Disabilities (UNCRPD),”tenik nia.
Nia dehan, formasaun ida ne’e mós sei liga ba Planu Asaun Annual kada ministériu hotu hodi bele implementa konvensaun ne’e ho di’ak.
“Agradese ba Governu Australia ne’ebé fó ona apoiu ba Timor-Leste, espera katak esforsu ne’ebé ita halo hamutuk bele atinje metas ne’ebé ita defini ona”, katak Gil da Cruz.
Iha fatin hanesan, Asesor Prinsipal ba asunto sosial ba ema ho difisiensia Gaspar Afonso hatete, formasaun ba embaixadór sira kona bá hari sira nia planu anual kada ministerial no akresenta konvensaun direitu ba EhD kada tinan ou fulan neen ( 6) tenki relata relatoriu.
Timor Leste ratifika ona konvensaun direitu ba EhD iha loron 04 fulan-Juñu ho hetan promulgasaun husi Prezidente Repubika, iha loron 12 Juñu.
Entretantu, Deputy Head of Mission Australian Embassy, Suzanne Wilson husu ba formandu sira atu bele aproveita formasun ida ne’e ho partisipativu hodi hetan koñesimentu no informasaun hotu ne’ebé adekuadu.
Nune’e, ba futuru bele implementa konvensaun ba ema ho defisiénsia ne’e ho di’ak.
“Governu Australia nafatin iha komitmentu hodi servisu hamutuk ho Timor-Leste, liu-liu oinsá asegura ema hotu-hotu ninia direitu inklui ema ho defisiénsia hodi la husik ema ida iha kotuk”, hato’o Suzanne Wilson.
Formandu sira ne’ebé tuir formasaun ne’e mai husi liñas ministeriais ne’ebé hili ona sai hanesan embaixadóres ba ema ho defisiénsia inklui parseiru sira.
