Diretora Ezekutiva JSMP, Ana Paula Marçal hatete, iha mundu internasionál inklui Timor-Leste selebra loron nasional feto hodi fó rekoñesimentu ba kontribuisaun feto iha setor hotu-hotu ba dezenvolvimentu nasional.

Nia haktuir, nasaun ne'e presiza promove valór igualdade no inkluzaun hodi kontinua tau aas direitu feto. Ne’e duni, importante tebes ba selebrasaun loron nasional feto ho tema “Feto Prontu Lidera."

JSMP rekoñese kontribuisaun feto iha área hotu nu’udar sentrál tebes, inklui vida polítika, vida ekonómia, asesu justisa no iha Governu.

"Ohin ita hamutuk ho komunidade sira selebra loron feto nian, nune’e bele kontribui no sira nia dedikasaun inklui sira nia luta no lideransa liu husi promove valor igualidade no inklusivu ne’ebé loloos tenke rekoñese importánsia papél feto no elimina violénsia hasoru feto no labarik feto sira,"dehan Ana Paula liu husi Komunikadu imprensa ne'ebé Jornal INDEPENDENTE asesu, (08/03).

Nia hatutan, Feto Timor-Leste maioria dezenvolve-an ona, iha kapasidade no abilidade no envolve an iha aspetu oin-oin, lidera ministériu, sai membru Parlamentu Nasional, lidera departementu no organizasaun nasionál no internasionál.

Nia akresenta, Estadu no Governu kada tinan tenke kontinua promove no asegura direitu feto labarik feto sira, hodi preve orsamentu iha kada ministériu atu asegura hakbiit feto iha setór hotu-hotu.  

"Estadu no Governu tenke introdús inisiativa oin-oin ba promosaun igualidade hodi kombate violénsia no diskriminasaun hasoru feto no labarik feto," tenik nia.

Feto barak iha area rurais no urbanu balun kontinua infrenta dezigualidade no diskriminasaun no violénsia oi-oin iha sira nia moris loro-loron husi sira nia parseiru, família, viziñu no komunidade.

Nia hatutan, situasaun violensia Hasoru feto sira ne’e kontinua akontese tanba kestaun norma sira sosiais no kultura ne’ebé sei metin iha komunidade nia hanoin.

"Feto sira kontinua hasoru problema atu asesu ba justisa formál, dala barak feto sira la aprezenta keixa hasoru aktu krime ne’ebé sira hasoru tanba presaun husi família, tauk fahe malu (divórsiu ka separa), tauk oan sira abandonadu no problema família sira seluk", nia informa.

Nia husu, komunidade sira atu respeita, hadomi, fó oportunidade no trata sira hanesan ita nia-an tanba sira ema hanesan mós ema mane no feto mak hun husi moris.

Iha biban ne’e, JSMP kongratula feto hotu iha mundu no feto Timor-Leste inklui mane sira hodi muda sira nia mentalidade no norma kultura desigualidade sira hodi respeita, hadomi no fó oportunidade ba feto iha sira idak-idak nia família.