Nia dehan, governu liuhusi Ministriu Interior simu ona naran komisariu PNTL foun hamutuk ema nain (9), tanba ne’e iha semana oin governu sei nomeia komisariu foun hodi halo preparasaun simu pose iha iha ámbitu selebrasaun loron PNTL ba dala XXIII iha 27 Marsu 2023.
Antonio dehan, lista kona-ba komisariu foun PNTL iha ona Primeiru Ministru, Taur Matan Ruak nia meza, kualidade hanean Ministru Interior sei foti desizaun atu halo nomesaun foun ba komisariu PNTL ba pedidu tinan liman nian.
Tanba ne’e, naturalmente hanesan ministru interior (MI), tuir lei organika PNTL nian fo kompetensia tomak ba membru governu ne’ebé lidera ministru interior mak sei hili komandante jeral foun ida ne’ebe nia hanoin diak atu lidera instituisaun PNTL.
Nia hatutan, iha Fevereiru nia laran, Komandu Jeral PNTL halo ona enkontru konsellu superior deside halo ona paraser no rekomendasaun ida hodi husu ministru Interior nia konsiderasuan.
“Maibe ita boot sira hatene maski iha rekomensaun atu konsidera ka la konsidera ne’e kompetensia ministru interior nian, tanba ne’e ministru interior bele la konsidera bele halo tuir nia hakarak, tanba nia uza nia kompetensia rasik,” dehan Antonio, iha Palasiu Governu, horisehik.
Tanba ne’e, Ministru Interior simu ona lista ministru interior nia fatin hamutuk superior na’in 9 mesak membru PNTL hotu.
“Ha’u hanoin iha loron 12 Marsu agora lae semana oin, tanba 27 Marsu tenke tomada de pose, entaun nomesaun ba komisariu PNTL foun ne’e tenke antes para komandu PNTL mos hatene ona se mak ba komisariu foun atu halo preparasaun ba iha loron espesial,” afirma nia.
Tanba ne’e, iha loron espesial ne’e presiza rekursu atu halo servisu preparasaun ba eventu ne’e bele la’ós di’ak, tanba governu sei konvida bainaka sira husi nasaun vizinu atu partisipa, maibé ne’e kompetensia tomak ministru interior mak sei deside.
Molok ne'e, iha 24 Fevereiru, Komandu PNTL realiza Reuniaun Konsellu Superior Extraordinaria hodi halibur ideia no hamosu pareser hodi intrega ba governu relasiona ho mandatu Komandante Jeral no Segundu Komandante Jeral ne’ebe maka sei remata nia mandatu iha loron 27 Marsu 2023.
Konsellu Superior Superintendente Xefe Polisia, Carlos Jeronimo hateten, tuir Lei Organika PNTL Nu.55/2022 artigu 35.5 no artigu 95.2 Loron 28 setembru konaba Estatutu Professional no Pessoal ho funsaun Polisial no ofisiu husi Vise Ministru Interior Nu.0200/IV Ministru Interior iha loron 16 Fevereiru 2023, orienta Komandante Jeral PNTL atu halo enkontru Konsellu Superior.
Nia hatutan, iha enkontru ne’e KS halo aprovasaun ba ajenda enkontru hafoin aprova Rezime Konsellu Superior nian no kontinua rona opiniaun membru konsellu sira konaba atu hili kandidatu ba Komandante Jeral PNTL ba periodu 2023-2026.
Iha reuniaun ne’e membru Konsellu sira fo sira nia hanoin atu halo pareser tuir saida maka Vise Ministru Interior nia karta refere ho nune’e maka hamosu opsaun tolu maka hanesan dahuluk mantein nafatin Komandante Jeral no Segundu Komandante Jeral, no sira husu mos atu halo justifikasaun.
Daruak segundu Komandante Jeral ho Superintendente Xefe nain rua(2) maka Superintendente Xefe Polisia Pedro Belo no Superintendente Xefe Polisia Henrique da Costa, maibe husu atu Konsellu aprejenta hotu Superintendente Xefe nain hitu (7) ne’ebe priense ona kondisaun tuir lei.
“Hafoin enkontru opiniaun hotu ne’ebe maka ohin hamosu iha reuniaun Konsellu Superior ne’e husi Sekretariadu sei prepara pareser ida ho opsaun tolu ne’e hodi hasae ba membru governu ne’ebe responsavel ba area seguransa interna nian atu nune’e membru governu ne’e hato’o proposta ba Konsellu Ministru,” dehan Carlos, iha nota imprensa ne’ebé INDEPENDENTE asesu, iha pajina PNTL.
Reuniaun KS ne’e hahu iha tuku 9:00-14:30 OTL no lidera husi Prezidente KS Komisariu Polisia Faustino da Costa akompaña husi Vice Prezidente Komisariu Polisia Mateus Fernandes no Sekretria KS Superintendente Xefe Polisia Carlos Jeronimo.
Partisipante ne’ebe maka partisipa iha reuniaun KS ne’e tuir Lei Organika PNTL kompojisaun membru du konsellu nain 31 no na’in rua (2) maka la partisipa nKomadante RAEOA Superintendente Xefe Polisia, Mateus Asunção no Komandante du Komandu Administrasaun Superintendente Xefe Polisia, Jose Neto Mok tanba sei iha estranjeiru.
