Padre ne'e moris iha Timor tinan barak nia laran, nia halo buat lubun ida apoiu Timor, liuliu Timor-Leste ninia luta ba independensia.
Ministru Prezidensiá Konsellu Ministru (MPKM), Fidelis Manuel Leite Magalhães hateten, Governu mós hasai ona nota ida ne'ebé laran susar ba falesimentu husi Pe. Fransisco Tavares dos Reis, Governu bainhira rona informasaun ne'e Primeiru Ministru no ministru membru Konsellu Ministru sente laran susar profunda tristeza ne'ebé klean ba falesimentu ne'e.
"Ita aproveita Tristeja ida ne'e atu hato'o obrigadu serbisu hotu ne'ebé nia halo, apoiu Timoroan hotu iha momentu sira difisil ita nia rai nian no nunka husik ita nia povu no sarani sira iha situasaun difisil liu ne'ebé mak Timor-Leste infrenta," dehan nia, iha Palásiu Governu, horisehik.
Nia afirma, harohan ba Na’i Maromak atu bele simu Na’i nia bibi atan ne'e iha kadunan santu, timoroan barak lo'os mak koñese padre Fransisco Tavares dos Reis ne'ebé sai padre iha tinan 40 resin liu ba.
Depois nia mós hanesan ema ne'ebé mak hamutuk ho Saudozu Nikolau Lobato no ema konfiansa ida Saudozu Nikolau Lobatu nian hafoin invazaun no nia mós padre ne'ebé sai paroku iha fatin barak Timor laran.
Padre mós edukador ida ne'ebé hanorin foin sa'e sira no hanorin iha semináriu rasik, ho ida ne'e ninia lalaok moris nian nia produs rezultadu barak, fo apoiu barak ba Timoroan sira.
"Hahú kedas husi periodu hafoin invazaun kontinua iha ai-laran no mós iha faze ida tuir mai durante okupasaun nian too agora ita ukun rasik an, nia sempre hamriik povu no sarani nia sorin hodi fo apoiu hotu ne'ebé nia bele fo Protesaun ba sidadaun sira nia moris, ida ne'e mak mensajen inisial husi governu," tenik nia.
